Аyollarga tadbirkorlik bilan shugʼullanishda koʼmak koʼrsatiladi

Vazirlar Mahkamasining 8.01.2021 yildagi «Xotin-qizlarni ijtimoiy qoʼllab-quvvatlash boʼyicha qoʼshimcha chora-tadbirlar toʼgʼrisida»gi 2-son qarori bilan Xotin-qizlar muammolarini «Аyollar daftari»ni yuritish orqali tizimli ravishda hal etish va ularni ijtimoiy qoʼllab-quvvatlash boʼyicha vaqtinchalik tartib tasdiqlandi.

Mahalla va oilani qoʼllab-quvvatlash vazirligi tomonidan hokimliklar bilan birgalikda 2021 yil 1 dekabrga qadar ushbu tartibning amaliyotda qoʼllanilishi tahlil qilinadi va sinovdan oʼtkaziladi.

«Аyollar daftari»ga 30 yoshdan oshgan quyidagi toifadagi xotin-qizlar kiritiladi:
 - ishsizlar;
 - boquvchisini yoʼqotgan ehtiyojmand xotin-qizlar;
 - ijtimoiy yordamga muhtoj 1 va 2 guruh nogironligi boʼlgan qizlar;
 - uy-joyini taʼmirlashga muhtoj I guruh nogironligi boʼlgan xotin-qizlar;
 - noturar joylarda istiqomat qilayotgan, turar joy mavjud boʼlmagan xotin-qizlar;
 - qaramogʼida bir va undan ortiq I yoki II guruh nogironligi boʼlgan bolalari mavjud yolgʼiz ayollar;
 - tibbiy himoyaga, huquqiy yordam olishga va psixologik maslahatga muhtoj ehtiyojmand xotin-qizlar.

Sektorlar ishchi guruhlari tomonidan biriktirilgan mahallalarda fuqarolar yigʼinlari xodimlari va faollari bilan birgalikda har yarim yilda bir marotaba, bunda yarim yillik birinchi oyining dastlabki 15 kunida uyma-uy yurish orqali xotin-qizlarning muammolari, ehtiyojlari va qiziqishlari oʼrganiladi. Shu bilan birga individual anketalar tuziladi va 1 kun ichida koʼrib chiqiladi.

Soʼngra 3 kundan oshmagan muddatda anketalardagi maʼlumotlar vazirliklar va tashkilotlarning maʼlumotlari bilan solishtiriladi hamda xotin-qizlarning ijtimoiy himoyaga muhtojlik darajasi (toifasi) aniqlanadi.

«Аyollar daftari»ga kiritiladigan xotin-qizlarning roʼyxatlari hamda ularning muammolarini bartaraf etishga qaratilgan «Yoʼl xaritasi» loyihasi 7 kundan oshmagan muddatda xalq deputatlari tuman (shahar) Kengashlariga tasdiqlash uchun kiritiladi.

Tasdiqlangan roʼyxatlar 3 kundan oshmagan muddatda «Mahalla» yagona axborot tizimiga kiritiladi, va buning asosida vaqtinchalik tartibda keltirilgan xizmatlar koʼrsatiladi.

Tadbirkorlik bilan shugʼullanish istagida boʼlgan xotin-qizlarga 150 BHMgacha miqdorda (33 mln 450 ming soʼm) kreditlar ajratiladi.

Kreditlar Xalq bankining filiallari tomonidan 6 oygacha imtiyozli davr bilan 3 yildan koʼp boʼlmagan muddatga ajratiladi. Bunda kreditlar qatʼiy navbat asosida (alfavit tartibida) taqdim etiladi.

Bundan tashqari, ayrim toifadagi yordamga muhtoj xotin-qizlarga bir yilda 2 BHMdan 4 BHMgacha boʼlgan miqdorda (446 ming soʼmdan 892 ming soʼmgacha) bir martalik moddiy yordam beriladi.

Shuningdek «Аyollar daftari»ga kiritilgan xotin-qizlarga turar joy ijara kompensatsiyasi belgilangan tartibda toʼlab beriladi. Bunda turar joy ijarasi toʼgʼrisidagi shartnoma 2021 yil 31 dekabrga qadar boʼlgan muddatga tuziladi, turar joy ijarasi uchun toʼlovlar ijaraga beruvchiga toʼgʼridan-toʼgʼri toʼlanadi.

«Аyollar daftari»ga ikki va undan ortiq masalalarini hal etish uchun kiritilgan xotin-qizlarning barcha masalalari toʼliq hal etilishi daftardan chiqarish uchun asos boʼladi. «Аyollar daftari»dan chiqarilgan xotin-qizlar tuman (shahar) mahalla va oilani qoʼllab-quvvatlash boʼlimlari tomonidan 5 kun ichida bu haqda yozma ravishda xabardor qilinadi.

Hujjat Qonun hujjatlari maʼlumotlari milliy bazasida eʼlon qilingan va 9.01.2021 yildan kuchga kirdi.

Manbaa Norma.uz

SSP Аxborot-xizmati