Dorivor oʼsimliklarni yetishtirayotgan korxona faoliyati oʼrganildi

Mamlakatimiz turli xil kasalliklarni dorivor oʼsimliklar asosida davolash boʼyicha oʼzining koʼp asrlik anʼanalariga ega ekanligini hammamiz yaxshi bilamiz. Boisi, ajdodlarimiz dorivor oʼsimliklarning xususiyatini yaxshi bilgan va ularni samarali qoʼlay olgan. Deyarli barcha kasalliklarga giyohlardan davo topgani ham hech kimga sir emas.

Bugungi kunda Respublikamizning barcha hududlarida, oʼrmon fondi va qishloq xoʼjaligi yerlarida dorivor oʼsimliklar bejizga yetishtirilayotgani yoʼq. Chunki aksariyat kasalliklarning davosi dorivor oʼsimliklarning guli, bandi yoki tomiridan tayyorlangan malhamda mujassam. Eng muhimi, dorivor oʼsimliklar xalq salomatligi barobarida, mamlakat iqtisodi uchun ham koni foyda.

Joriy yilda Oʼzbekiston Respublikasi Prezidentining Respublikada dorivor va ziravor oʼsimliklarni rivojlantirishga doir qabul qilingan qarori dorivor va ziravor oʼsimliklar plantatsiyalarining kengayishi, farmatsevtika tarmogʼining sifatli dorivor va ziravor oʼsimliklar xomashyolariga boʼlgan talabini toʼla qondirilishiga mustahkam zamin yaratdi.

Dorivor va ziravor oʼsimlik yetishtiruvchilarni qoʼllab-quvatlash boʼlimi xodimlari Toshkent viloyati Qibray tumaniga tashrif buyurishdi.

Dastlab «GERBOFARM» xususiy korxonasining rahbari Iskandarov Botir bilan uchrashildi.

Hozirgi kunda korxona dalalarida asosan naʼmatak, moychechak, tirnokgul, mavrak, kalampir yalpiz, arslonkuyruk, makkai sano, tukli erva (pol-pola), steviya, topinambur, valeriana, limonoʼt dorivor oʼsimliklar yetishtiriladi va korxonada fitachoy, tabletka holida 33 turdagi mahsulot ishlab chiqariladi.

«GERBOFARM» xususiy korxonasi dalalarida 2020 yilda 28,3 tonna dorivor oʼsimlik yetishtirilgan boʼlib, shu bilan birgalikda 500 ming dona tayyor mahsulot ishlab chiqarildi, xozirgi kunda korxonada 11 xodim oʼz faoliyatini yuritmoqda.

Bugungi kunda davlatimiz tomonida sohaga qaratilgan eʼtibor juda ham yuqori darajada. Shu bilan bir qatorda dorivor oʼsimliklarga boʼlgan qiziqish tobora ortib, ularni tabiatdan nafaqat yovvoyi holda terib olish, balki plantatsiya usulida koʼpaytirish va qayta ishlashni tashkil etish bilan shugʼullanuvchi fermerlar, tadbirkorlar va boshqa subʼektlarning soni sezilarli darajada ortib bormoqda.

Korxona raxbari dorivorchilik sohasiga qiziquvchilarga bu sohada koʼproq daromad topish uchun dorivor oʼsimlik mahsulotini qadoqlab sotish kerakligini taklif etdi. Misol tariqasida: dorivor moychechak 1 ga dan 800 kg moychechak guli yigʼiladi. Dorivor oʼsimlik mahsuloti xom ashyo sifatida kilogrami 25 000 soʼmdan sotilsa 20 mln. soʼm boʼladi. Аgar uni tayyor mahsulot sifatida 50 g dan qadoqlansa, 16 000 dona qadoq chiqadi va uni oʼrtacha 3500 soʼmdan sotilsa, 56 mln. soʼm boʼladi.

SSP Matbuot xizmati