Har bir “VATT” qadrli

Bugungi kunda jahonda global miqyosda energiyani tejash, tabiiy resruslardan foydalanishda tejamkorlikni ta'minlash, samarali energiya sarfiga o‘tish hamda atrof-muhit va inson sog‘lig‘iga zarar yetkazmaydigan muqobil energiya manbaalaridan keng foydalanish kelajakda Yer yuzidagi rivojlanishning asosiy tendensiyalaridan biri bo‘lib qoladi.

Albatta, energiya samaradorligini avvalo, iqtisodiyotning sanoat tarmoqlarida faol amalga oshirilishi, energiya sarfida tejamkorlikka erishish va resurslarni sarflashda zamon talabiga javob beradigan rasional foydalanish va  iqtisod qilishning zamonaviy yondoshuvlarini hayotning barcha jabhalariga keng joriy etish muhim ahamiyat kasb etadi.

Butun dunyoda bo‘lgani kabi O‘zbekistonda ham iqtisodiyot tarmoqlarida energiya resurslarini sarflashda tejamkorlikka erishish, energiya va resurslardan oqilona foydalanishga qaratilgan zamonaviy texnologiyalar, ishlanmalar va nou-xaularni hamda muqobil energiya manbalaridan foydalanishni jadal tatbiq etish davr talabi, qolaversa, jahon bozorida raqobatqodirlikning asosini tashkil etmoqda.

Jahonda olib borilayotgan iqtisodiy tadqiqotlar shuni ko‘rsatmoqdaki, yuqori qo‘shilgan qiymatga ega mahsulotni ishlab chiqarishda  mahsulot birligiga sarflanayotgan nisbiy energiya sarfining yuqoriligi aksariyat ishlab chiqaruvchilarning global miqyosda raqobatga bardosh bera olmayotganliklaridan dalolat beradi.

Shuning uchun energiya resurslarini tejash orqali mahsulot tannarxini kamaytirishga erishgan holda O‘zbekistonda ishlab chiqarilayotgan mahsulotlarni tashqi va ichki bozordagi raqobatqodirligini oshirish milliy iqtisodiyotimiz rivojlanishining asosiy omillaridan biri bo‘lib qoladi.

O‘zbekiston Savdo-sanoat palatasi mahalliy biznes hamjamiyati tomonidan energiya sarfida tejamkor boshqaruv uslublarini, resurslar tejamkorligini ta'minlaydigan zamonaviy texnologiyalarni joriy etishni hamda ishlab chiqarishda energiya va barcha tabiiy resurslardan oqilona va samarali foydalanishni har tomonlama qo‘llab-quvvatlaydi.

#saveenergy.uz

O‘zbekiston Savdo-sanoat palatasi Eksportga ko‘maklashish, import masalalari, savdo, mahsulot va xizmatlarni standartlashtirish va sertifikatsiyalash boshqarmasi tomonidan tayyorlandi.