Xususiylashtirish borasida yangicha qadam yoxud Prezidentning 2021 yil 11 fevraldagi Farmoni bilan sotilishi belgilangan yirik davlat aktivlarini ommaviy savdolarga chiqarish boshlandi

Bugungi kunda respublikamizda tadbirkorlik faoliyatini qo‘llab - quvvatlash, iqtisodiyotda davlat ulushini qisqartirish bo‘yicha bir qator samarali ishlar amalga oshirilmoqda.

Xususan, xususiylashtirish ishlarini yanada jadallashtirish bo‘yicha O‘zbekiston Respublikasi Prezidenti hamda hukumatning ko‘plab qarorlari qabul qilinib, bu borada keng ko‘lamli ishlar olib borilmoqda.

Barchaga ma'lumki, O‘zbekiston Respublikasi Prezidentning “Davlat aktivlarini xususiylashtirish jarayonlarini yanada jadallashtirish to‘g‘risida” 2021 yil 11 fevraldagi PF-6167-son Farmon bilan davlatning bir qator yirik aktivlarini xususiylashtirish belgilangan.

Davlat aktivlarini boshqarish agentligi mazkur farmonning 1-ilovasiga muvofiq, joriy yilning mart oyida savdolarga chiqarilishi belgilangan quyidagi davlat aktivlarini yangicha, zamonaviy usullar orqali sotish bo‘yicha savdolar boshlanganini e'lon qildi, jumladan:

“Poytaxt biznes majmuasi” MChJ mulkiy majmuasi, “Ichan qal'a” mehmonxona majmuasi, “Beldirsoy oromgohi” dam olish maskani, “Sijjak” dam olish maskani, “Qizil suv sport sog‘lomlashtirish” MChJ, “Malika” savdo va maishiy xizmat ko‘rsatish majmuasi, “Gazetalar ishlab chiqarish majmuasi binosi”, “Ma'muriy bino” (Sobiq Respublika birja markazi).

Ahamiyatlisi shundaki, davlat aktivlarini sotish ishlari Davlat tender komissiyasi tomonidan amalga oshirilib, savdolar ikki bosqichda o‘tkaziladi.

Birinchi bosqichda – talabgorlar oldindan saralanadi, ikkinchi bosqichda, talabgorning tijorat takliflari (sotib olish narxi va to‘lovni amalga oshirish muddati) hamda to‘lov qobiliyati baholanadi.

Shuni alohida qayd etish lozimki, Davlat aktivlarini boshqarish agentligi tomonidan yuqorida qayd etilgan Farmon doirasida “Avtogazta'minot” MChJning Buxoro, Qashqadaryo, Navoiy, Toshkent va Xorazm viloyatlari hamda Qoraqalpog‘iston Respublikasida joylashgan 20 ta ko‘chmas mulk ob'ektlari jumladan, 11 ta avtomobillarga metan (propan) gaz quyish shoxobchalari tayyor biznes sifatida chiqarildi.

E'tiborli jihati shundaki, Mazkur avtomobillarga metan gaz quyish shaxobchalaridagi faoliyatni amalga oshirish uchun berilgan amaldagi lisenziyalar, uni sotib olgan xaridorlar lisenziya talablariga javob bersa, xaridorlarning nomiga qayta rasmiylashtiriladi.

Eslatma: Sotib olish to‘lovlari 90 kun davomida amalga oshirilishi shart.

To‘lovlar bir oy ichida to‘liq amalga oshirilsa, Markaziy bankning yillik qayta moliyalashtirish stavkasiga teng miqdorda chegirma beriladi.

Qo‘shimcha ma'lumotlarni Davlat aktivlarini boshqarish agentligining davaktiv.uz va e-auksion.uz saytlari orqali olishingiz mumkin.

SSP Axborot-xizmati