Umumiy ovqatlanish va turizmga qator imtiyozlar taqdim etildi

25 avgust kuni Prezidentning “Umumiy ovqatlanish va turizm sohalarini qoʼllab-quvvatlashning qoʼshimcha chora-tadbirlari toʼgʼrisida”gi qarori qabul qilindi.

Koronavirus pandemiyasi davrida umumiy ovqatlanish va turizm sohalarida faoliyat yuritayotgan tadbirkorlik subʼektlarini qoʼshimcha ravishda qoʼllab-quvvatlash maqsadida:

2021 yil 1 sentyabrdan boshlab 2021 yil 31 dekabrga qadar umumiy ovqatlanish korxonalari yuridik shaxslardan olinadigan yer soligʼi va yuridik shaxslarning mol-mulkiga solinadigan soliqni toʼlashdan ozod qilinadi;
2023 yil 1 sentyabrga qadar turistik (mehmonxona) yigʼimini hisoblash va toʼlash toʼxtatiladi.
Umumiy ovqatlanish korxonalariga mahalliy davlat hokimiyati organlariga ariza yubormasdan turib, soliq organlarini xabardor qilgan holda:

• aylanmadan olinadigan soliq;
• foyda soligʼi;
• suv resurslaridan foydalanganlik uchun soliq;
• yuridik shaxslardan olinadigan yer soligʼi;
• yuridik shaxslarning mol-mulkiga solinadigan soliq va yigʼimlar boʼyicha,

2021 yil 15 avgust holatiga koʼra mavjud qarzdorlikni, shuningdek, barcha soliqlar boʼyicha jarima va penyalarni 2022 yil 1 yanvardan 1 iyulga qadar foizlarni undirmasdan teng miqdorlarda kechiktirib (boʼlib-boʼlib) toʼlash huquqi beriladi.

Manbaa: Norma.uz

SSP Axborot-xizmati