Tadbirkorlik subyektlari diqqatiga!

O‘zbekiston Respublikasi Prezidentining 2023 yil 28 fevraldagi Farmoniga muvofiq 2023-2024 o‘quv yilidan boshlab respublikamizning barcha hududlarida umumiy o‘rta ta’lim muassasalarining boshlang‘ich sinf o‘quvchilarini bir mahal bepul oziq-ovqat bilan ta’minlashni joriy etish belgilangan.

Mazkur tizimni davlat-xususiy sherikchilik tamoyili asosida mahalliy oziq-ovqat mahsulotlari ishlab chiqaruvchilarni jalb etgan holda amalga oshirish ko‘zda tutilmoqda. Bunda boshlang‘ich sinf o‘quvchilarini bepul oziq-ovqat bilan ta’minlash davlat mablag‘lari hisobidan qoplanishi belgilangan.

Oziq-ovqat mahsulotlari bilan bepul ta’minlashda Jahon sog‘liqni saqlash tashkiloti (VOZ) hamda Oziq-ovqat va qishloq xo‘jaligi tashkilotlarining (FAO) bolalarni sog‘lom ovqatlantirish bo‘yicha tavsiyalarini inobatga olinishi lozim bo‘ladi:

• shakar iste’molini kamaytirish;
• to‘yinmagan yog‘larni iste’mol qilishga o‘tish, transyog‘lardan foydalanishni cheklash;
• yodlangan tuzlarni ishlatish;
• don, dukkakli mahsulotlar, meva va sabzavotlar, yong‘oqlarni ko‘proq iste’mol qilish;
• ichimlik sifatida tozalangan gazsiz suvdan foydalanish.

Mazkur tizimni atroflicha ko‘rib chiqish maqsadida O‘zbekiston Respublikasi Iqtisodiyot va moliya vazirligi va Savdo-sanoat palatasi tomonidan mahalliy oziq-ovqat ishlab chiqaruvchilar bilan birgalikda joriy yil may oyida boshlang‘ich sinf o‘quvchilarini bepul oziq-ovqat bilan ta’minlash masalalarini muhokama etish rejalashtirilmoqda.

Ushbu tadbirda ishtirok etish istagidagi oziq-ovqat ishlab chiqaruvchilar takliflarini (korxona nomi, ishlab chiqaradigan oziq-ovqat mahsuloti, tegishli sertifkatlariga egaligi, joylashgan manzili, tadbirda ishtirok etadigan rahbarning ismi-sharifi va aloqa telefon raqami) Savdo-sanoat palatasiga 2023 yil 8 may soat 10-00 ga qadar ma’lum qilishlarini so‘raymiz.

Ushbu masalada qo‘shimcha ma’lumot olish uchun Savdo-sanoat palatasi mas’ul xodimi Yo‘ldoshali Xusanboyevga +99878 150-60-06 telefon raqami orqali murojaat qilish mumkin.