Xitoyning «Taitong International Transport» kompaniyasi prezidenti bilan uchrashuv bo‘lib o‘tdi

Oʼzbekiston Respublikasi Prezidentining 2023-yil may oyida Xitoy Xalq Respublikasiga amalga oshirgan oliy darajadagi tashrifi davomida tashkil etilgan davra suhbatida XXRning «Taitong International Transport» kompaniyasi prezidenti Chu Syuan Oʼzbekistonda logistika habini ochish istagi borligini maʼlum qilgan. 

Shu bois, ikki tomonlama munosabatlarni yanada yuqori bosqichga olib chiqish maqsadida, kompaniyaning O'zbekistonga tashrifi tashkil etilib, joriy yilning 29 may kuni Oʼzbekiston Savdo-sanoat palatasida kompaniya prezidenti Chu Syuan bilan uchrashuv boʼlib oʼtdi.

Uchrashuvda Oʼzbekiston Respublikasi Transport vazirligi boshqarma boshligʼi Xaydarov Nodir, Oʼzbekiston bojxona brokerlari uyushmasi raisining oʼrinbosari Xalilov Enver va Oʼzbekiston Savdo-sanoat palatasi vakillari ishtirok etdi.

«Taitong International Transport» Xitoyning Xebey provintsiyasida yuk tashish, omborxona, avtomobil, temir yoʼl, dengiz, havo transporti yoʼnalishlariga ixtisoslashgan yirik transport kompaniyasi hisoblanadi.

Kompaniyaning tashrifidan maqsad Oʼzbekiston-Xitoy korxonasini tashkil etib, ofis ochish imkoniyatlarini koʼrib chiqishdan iborat.

Shuningdek, uchrashuvda Toshkent va Аndijon shaharlarida faoliyat olib borish va temir yoʼllarda bojxona nazoratini yaratish imkoniyatlari hamda Toshkent va Аndijondan Turkiya, Saudiya Аrabistoni, Eron, Аfgʼoniston va boshqa Yaqin Sharq mamlakatlariga tranzit tashish jarayonlari va xarajatlari muhokama qilindi.

SSP matbuot ximati