Yevropa Ittifoqi delegatsiyasi missiyasi vakili janob Yakopo Turini bilan uchrashuv

14-noyabr kuni O‘zbekiston Savdo-sanoat palatasida Raisning birinchi o‘rinbosari Islom Jasimov va Yevropa Ittifoqi delegatsiyasi missiyasi vakili janob Yakopo Turini bilan uchrashuv bo‘lib o‘tdi.

Uchrashuvda Palata tomonidan Markaziy Osiyo Mintaqaviy Ekologik Markazi bilan hamkorlikda amalga oshirilayotgan “Qishloq-oziq-ovqat sanoatida resurs samaradorligi” (REAP) loyihasini amalga oshirish bilan bog‘liq masalalar muhokama qilindi.

REAP loyihasining asosiy maqsad va vazifalari quyidagilardan iborat:

- kichik korxonalarga (Toshkent, Farg‘ona va Buxoro viloyatlarida) resurslardan samarali foydalanish texnologiyalarini joriy etish asosida mahsulot tannarxini pasaytirishda amaliy yordam ko‘rsatish;

- barqaror iste’mol va ishlab chiqarish konsepsiyasiga asoslangan yangi moliyalashtirish vositalarini joriy etishda mahalliy moliya institutlariga ko‘maklashish;

- mavjud qishloq xo‘jaligi klasterlariga tejamkor ishlab chiqarish amaliyotini integratsiyalashuviga ko‘maklashish;

- ishlab chiqarish jarayonlarining uzoq muddatli istiqbolda atrof-muhitga ta'siri masalalarida mahalliy tashkilotlarning institutsional rivojlanishi.

Loyihani amalga oshirish doirasida o'tgan davrda O‘zbekistondagi korxonalarni qo'llab-quvvatlash uchun ko‘nikma, bilim va vositalarga ega 12 ta texnik maslahatchi tayyorlandi.

Oʻqitilgan mahalliy texnik maslahatchilar xalqaro ekspertlar bilan birgalikda Oʻzbekistonda 136 ta kichik va oʻrta korxonalar (230 ta korxona rejalashtirilgan) uchun dastlabki baholash va resurslar samaradorligini hisoblash ishlarini olib bordi.

Ushbu korxonalar xom ashyo, energiya va suv resurslarini tejash maqsadida resurslar samaradorligini oshirish bo‘yicha chora-tadbirlarni amalga oshirishda qo‘llab-quvvatlanmoqda, bu esa sezilarli tejash imkonini beradi va mahsulot tannarxini pasaytiradi.

Islom Jasimov Yevropa Ittifoqi missiyasi vakiliga ishlab chiqarishda energiya tejovchi texnologiyalarni keng joriy etish, qayta tiklanuvchi energiya manbalaridan foydalanishni kengaytirish, iqtisodiyotning turli tarmoqlarida energiya samaradorligini oshirish asosida iqtisodiyotda energiya va resurs xarajatlarini kamaytirish sohasida O‘zbekiston Respublikasi Prezidenti hujjatlariga muvofiq qabul qilingan davlat dasturlari ijrosi haqida ma’lumot berdi.

SSP matbuot xizmati