Koreya xalqaro hamkorlik agentligining (KOICA) O'zbekistondagi vakolatxonasi direktori Shin Myung Seop bilan uchrashuv

O'zbekiston Savdo-sanoat palatasi raisi, Toshkent to'qimachilik va yengil sanoat instituti rektori Davron Vaxabov Koreya xalqaro hamkorlik agentligining (KOICA) O'zbekistondagi vakolatxonasi direktori Shin Myung Seop bilan uchrashuv o'tkazdi. 

Hozirgi kunda Savdo-sanoat palatasi va KOICA o‘rtasida budjeti 5,5 million dollar bo‘lgan "O‘zbekistonda biznes-inkubatorlarni yaratish va tadbirkorlikning o‘sishini rag‘batlantirish" loyiha muvaffaqiyatli amalga oshirib kelinmoqda.

Loyiha Koreyaning ilg‘or tajribasini hisobga olgan holda ish boshlagan tadbirkorlarga biznes g‘oyalari va loyihalarini amalga oshirishda har tomonlama yordam ko‘rsatish tizimini rivojlantirishga qaratilgan.

Bugungi uchrashuvda tomonlar TTYSIning raqamlashtirish jarayonini boshlash hamda uning kelajakdagi istiqbollari xususida suhbat qurishdi.

Muzokaralar natijasida institut talabalari manfaatlaridan kelib chiqqan holda Davron Vaxabov tashabbusi bilan Koreyaning to‘qimachilik va yengil sanoat sohalaridagi eng ilg‘or va reytingi baland oliy o‘quv yurtlari bilan TTYSI o‘rtasida “2+2” o‘quv dasturini tashkil etish bo’yicha kelishib olindi. Ya’ni talabalar 1-, 2-kurslarni о‘z yurtida о‘qisa, 3-, 4-kurslardagi ta’lim xorijda olib boriladi.

SSP matbuot xizmati