Qoraqalpog‘istonda “Yosh tadbirkorlar forumi” tashkillashtirildi

Respublikamiz yoshlarini qo‘llab-quvvatlash, ularning tadbirkorlik sohasidagi faolligini yanada oshirish maqsadida bugun O‘zbekiston Savdo-sanoat Palatasining Qoraqalpog‘iston Respublikasi boshqarmasi tomonidan “Yosh tadbirkorlar forumi” tashkillashtirildi.

Tadbirda Qoraqalpog‘iston Respublikasi Jo‘qorg‘i Kengashi Raisining tadbirkorlikni rivojlantirish bo‘yicha maslahatchisi J.Yesmurzayev, O‘zbekiston Savdo-sanoat Palatasining Qoraqalpog‘iston Respublikasi boshqarmasi boshlig‘i K.Artikov, O‘zbekiston Yoshlar Ishlari Agentligi Qoraqalpog‘iston Respublikasi boshqarmasi boshlig‘ining o‘rinbosari M.Tursinov, biznes faoliyatida muvaffaqiyatga erishgan yosh tadbirkorlar, hunarmandlar va tadbirkorlikka qiziquvchan 300 dan ortiq faol yoshlar qatnashdi.

Forum davomida yoshlar kichik biznes uchun maxsus asbob-uskunalar, Qoraqalpog‘istonlik tadbirkorlar va hunarmandlar tomonidan ishlab chiqarilgan tovarlar va mahsulotlar ko‘rgazmasida qatnashish imkoniyatiga ega bo‘lishdi.

Tadbirda yosh bo‘lishiga qaramasdan tadbirkorlik faoliyatida yutuqlarga erishgan, hozirgi kunda Respublikamizda o‘zlarining mashhur brendlariga ega bo‘lgan yosh biznes vakillari ishtirokida master-klass tashkillashtirildi.

Master-klass davomida spikerlar tadbirkorligini qanday boshlaganligi, faoliyati davomida qiyinchiliklar va ulardan mardona o‘tganligi, biznes olamida muvaffaqiyatga erishish sirlari haqida batafsil so‘zlab berdilar.

A’lo kayfiyat bilan boshlangan “Yosh tadbirkorlar forumi” konsert dasturi bilan davom etdi.

SSP matbuot xizmati