Prezident qarorining mazmun-mohiyati tushuntirildi

O‘zbekiston Savdo-sanoat palatasining Qoraqalpog‘iston Respublikasi boshqarmasida O‘zbekiston Respublikasi Prezidentining 2024-yil 9-yanvardagi PQ-7-sonli "2024 yilda yangi ish o‘rinlarini tashkil etish va aholi bandligiga ko‘maklashish dasturi to‘g‘risida" Qarori ijrosini ta’minlash maqsadida yig'ilish bo‘lib o‘tdi.

Yig'ilishda Qoraqalpog‘iston Respublikasi Vazirlar Kengashi, Iqtisodiyot va moliya vazirligi, O‘zbekiston Savdo-sanoat palatasi, vazirliklar, idoralar va tijorat banklari rahbarlari va vakillari qatnashdi.

Iqtisodiyot va moliya Vazirining birinchi o‘rinbosari Ilhom Norqulov raisligidagi uchrashuv davomida Respublika ishchi guruhi va Qoraqalpog‘iston Respublikasi Vazirlar Kengashi Raisi birinchi o‘rinbosari tomonidan iqtisodiy kompleksga kiruvchi tashkilot rahbarlari va ishchi guruh a’zolariga aholini biznesga jalb qilish yo‘nalishlari bo‘yicha vazifalar tushuntirilib, aholini biznesga jalb qilish, ularni bandligini ta’minlash hamda zarur shart-sharoitlar yaratish borasida 2024-yildagi muhim vazifalarning mazmun-mohiyati haqida so‘z bordi.

Uchrashuv so‘ngida 19-yanvar kuni tuman (shahar)larga biriktirilgan Ishchi guruhlar tomonidan topshiriq natijalari (jadvallar), o‘rganishlarda aniqlangan muammo va takliflarni umumlashtirish, amalga oshirilgan ishlar bo‘yicha axborot tayyorlash belgilab olindi.

SSP matbuot xizmati