Қишлоқ хўжалиги маҳсулотлари экспортини ошириш мақсадида эксперт кенгаши ўтказилди

Қишлоқ хўжалиги маҳсулотлари экспортини оширишга тўсқинлик қилаётган муаммоларни муҳокама қилиш ҳамда уларни бартараф этиш бўйича таклифлар ишлаб чиқиш мақсадида, жорий йилнинг 16 февраль куни Ўзбекистон Савдо-саноат палатасида қишлоқ хўжалиги маҳсулотларини етиштириш, қайта ишлаш ва экспорт қилиш фаолиятига алоқадор бўлган давлат органлари ва компанияларнинг вакиллари иштирокида эксперт кенгаши ўтказилди.

Мамлакатимиз аҳолисининг озиқ-овқат махсулотлари хавфсизлигини таъминлаш, бозорларимизни арзон ва сифатли қишлоқ хўжалик маҳсулотлари билан янада тўлдириш, халқимизнинг эҳтиёжидан ошиқча маҳсулотларни хорижий давлатларга экспорт қилиш кўламини кенгайтириш, шу орқали қишлоқ меҳнаткашларининг даромадини ошириш, юртдошларимизнинг турмуш фаровонлигини юксалтиришда аҳоли ихтиёридаги томорқа майдонларидан унумли фойдаланиш муҳим аҳамиятга эга.

Ўзбекистон — қишлоқ хўжалигида кўп йиллик бой тажриба ва юксак илмий салоҳиятга эга мамлакат. Республикамиз аграр соҳа ходимларининг бугунги меҳнатлари замирида қишлоқ хўжалиги маҳсулотлари етиштиришни кўпайтириш орқали халқимизнинг озиқ-овқат махсулотлари хавфсизлигини таъминлаш, турмуш фаровонлигини ошириш, иқтисодиётни янада ривожлантиришдек юксак вазифалар мужассам.

Тадбирда сузга чиққанлар соҳа равнақига қаратилаётган эътибор, қишлоқ одамларига яратиб берилаётган муносиб меҳнат шароитлари туфайли ушбу эзгу мақсадга тўлиқ эришилаетгани хамда Президентимиз Шавкат Мирзиёевнинг 2016 йил 5 октябрдаги “Тадбиркорлик фаолиятининг жадал ривожланишини таъминлашга, хусусий мулкни ҳар томонлама ҳимоя қилишга ва ишбилармонлик муҳитини сифат жиҳатидан яхшилашга доир қўшимча чора-тадбирлар тўғрисида”ги фармони бу борада муҳим дастуриламал булаетганини алохида такидлаб утишди.

Бугунги кунда юртимизда 160 мингдан зиёд фермер хўжаликлари фаолият кўрсатаётган бўлиб, уларнинг 36 мингдан ортиғи кўп тармоқли йирик субъектлардир. Уларда деҳқончилик ёки чорвачилик билангина чекланиб қолмасдан, балки замонавий технологиялар, ихчам қайта ишлаш ускуналари жалб этилган ҳолда, қўшимча тармоқлар ўзлаштирилган. Бу аҳоли, айниқса, қишлоқ одамларининг бандлигини таъминлаш, даромадини ошириш, ички бозорни арзон ва юқори сифатли маҳсулотлар билан тўлдиришда муҳим омил бўлмоқда.

Тадбирда Ўзбекистон Президенти 7 февраль кунги фармони билан 2017−2021 йилларда Ўзбекистонни ривожлантиришнинг бешта устувор йўналиши бўйича ҳаракатлар стратегиясининг 3.3. бандида Қишлоқ хўжалигини модернизация қилиш ва жадал ривожлантириш: таркибий ўзгартиришларни чуқурлаштириш ва қишлоқ хўжалиги ишлаб чиқаришини изчил ривожлантириш, мамлакатимиз озиқ-овқат хавфсизлигини янада мустаҳкамлаш, экологик тоза маҳсулотлар ишлаб чиқаришни кенгайтириш, аграр секторнинг экспорт салоҳиятини сезиларли даражада ошириш; фермер хўжаликлар, энг аввало, қишлоқ хўжалиги маҳсулотлари ишлаб чиқариш билан бир қаторда, қайта ишлаш, тайёрлаш, сақлаш, сотиш, қурилиш ишлари ва хизматлар кўрсатиш билан шуғулланаётган кўп тармоқли фермер хўжаликларини рағбатлантириш ва ривожлантириш учун қулай шарт-шароитлар яратиш;қишлоқ хўжалиги маҳсулотларини чуқур қайта ишлаш, ярим тайёр ва тайёр озиқ-овқат маҳсулотлари ишлаб чиқариш бўйича энг замонавий юқори технологиялар асосида асбоб-ускуналар билан жиҳозланган янги қайта ишлаш корхоналарини қуриш, мавжудларини реконструкция ва модернизация қилишга қаратилган инвестиция лойиҳаларини амалга ошириш каби белгиланган вазифаларни амалга ошириш буйича хам атрофлича фикр ва мулохазалар билдирилди.

Мутахассислар томонидан тадбиркорликка доир қонунчилигимизга киритилган ўзгартиш ва янгиликлар, имтиёз ва қулайликлар тўғрисида атрофлича маълумот берилди. Аҳоли томонидан билдирилган фикр-мулоҳазалар, тавсиялар, келтирилган муаммоли масалалар жойида ўрганилиб, уларнинг ечими бўйича тегишли чоралар кўрилди.

ЎзССП Матбуот хизмати