Ўзбекистон-Германия бизнес-форуми ва кооперация биржаси

Ўзбекистон Республикаси Савдо-саноат палатаси томонидан жорий йилнинг 30 майидан 2 июнигача бўлган даврда Германия Озиқ-овқат ва қишлоқ хўжалиги федерал вазирлигининг Савдо ва сифат соҳасидаги сиёсатни қўллаб-қувватлаш департаменти раҳбари Lipinski Axel бошчилигидаги Германия ишбилармон доираларининг мамлакатимизга ташрифи ташкил этилди.

Мазкур ташриф доирасида 31 май куни «Пойтахт» Бизнес-марказида қишлоқ хўжалиги техникасини ишлаб чиқариш бўйича немис компаниялари иштирокида Ўзбекистон-Германия бизнес-форуми ва кооперация биржаси бўлиб ўтди. Ушбу тадбир ишбилармонлик ҳамкорлигини ривожлантириш, шунингдек қўшма ишлаб чиқаришларни ташкил этиш мақсадида хорижий инвестицияларни жалб қилиш учун қўшимча туртки сифатида хизмат қилади.

Германия делегацияси қуйидаги ишлаб чиқарувчилардан таркиб топди:

▪️ қишлоқ хўжалиги техникаси;

▪️ юк ташувлари учун транспорт воситалари;

▪️ тупроққа ишлов бериш, экин экиш ва ҳосилни йиғиш машиналари;

▪️ ҳайвонларни озиқлантириш учун техника;

▪️ ғаллага ишлов бериш ва тозалаш қурилмалари.

Тадбирни ўтказишдан кўзланган мақсад ўзбек ва немис компаниялари ўртасида савдо алоқалари йўлга қўйилишини қўллаб-қувватлаш, янги қўшма корхоналарни ташкил этиш ва янги инвестиция лойиҳаларини амалга ошириш масалаларини кўриб чиқишдан иборат бўлди.

Форум чоғида қайд этилганидек, мазкур учрашув икки томонлама ҳамкорликни ривожлантириш истиқболларига оид масалалар бўйича ўзаро фикр алмашинувига қулай имконият яратиб берди. Суҳбат давомида шунингдек, савдо-иқтисодий ҳамкорлик масалалари ҳам батафсил муҳокама қилинди.

Қайд этиш керакки, Германия билан муносабатлар анъанавий равишда илғор ва кўп тармоқли хусусиятга эга бўлиб, ҳамкорлик соҳаларининг кенг кўламини қамраб олади. Хусусан, икки давлат ўртасида салмоқли шартнома-ҳуқуқий база шакллантирилган.

Германия Ўзбекистоннинг Европадаги асосий савдо-иқтисодий ҳамкорларидан бири саналади. 2016 йил якунлари бўйича Ўзбекистон-Германия маҳсулот айланмаси ҳажми 520,1 млн. АҚШ долларига етди. Икки мамлакат ўртасидаги молиявий ва техник ҳамкорликнинг умумий ҳажми 329,9 млн. евродан ошади.

Асосий экспорт позициялари: транспорт ва туризм хизматлари, сархил ва қайта ишланган мева-сабзавот маҳсулотлари, мис буюмлар, ноорганик кимё маҳсулотлари, матолар, пахта толаси.

Айни пайтда Ўзбекистон Республикасида Германия инвесторлари иштирокида ташкил этилган 110дан зиёд корхона фаолият юритиб келади ва улардан қарийб 30 таси 100 фоиз Германия капиталига эга.

Тадбирда томонлар қишлоқ хўжалиги маҳсулотларини етиштириш ва чуқур қайта ишлаш, озиқ-овқат маҳсулотларини сақлаш, қадоқлаш ва экспорт қилиш, замонавий қўшма корхоналарни ташкил этиш бўйича комплексларни қуриш масалаларини кўриб чиқдилар.

Суҳбат чоғида мазкур ташриф иккала мамлакатнинг ишбилармон доиралари вакиллари ўртасидаги ўзаро манфаатли алоқаларга янги мазмун бағишлашига ишонч билдирилди.

ЎзССП ахборот хизмати