Республикамизда «старт-ап» ҳафталиги ўтказилмоқда

Республикамизнинг барча шаҳар ва туманларининг олий ўқув юртлари ва касб-ҳунар коллежи битирувчиларининг бандлигини таъминлаш бўйича «старт-ап» ҳафталиги ўтказилмоқда.

2017 йил 6 июнь куни Кегейли Майший хизмат кўрсатиш  касб-хунар коллежида Бандлик ва меҳнат муносабатлари вазирлиги, Ўзбекистон Республикаси Марказий банки ва Кегейли тумани ҳокимлиги билан ҳамкорликда Кегейли тумани касб-ҳунар коллежлари битирувчиларининг бизнес ғояларини саралаш “СТАРТ-АП” хафталиклари – инновацион ғоялар танловининг намунавий тарзда якуний туман босқичи ўтказилди. 

Тадбирда Кегейли тумани Бандликка кўмаклашиш маркази бошлиғи Н.Акимниязов, Ўзбекистон Савдо-саноат палатасининг Қорақалпоғистон Республикаси бошқармаси бошлиғи Х.Қайпназаров, АТ “Асака банк” Нукус филиалидан Қ.Токымбетов, АТ “Халқ банк” Кегейли тумани филиали бошқарувчи ўринбосари Д.Кайпов, АТ “Агро банк” Кегейли тумани филиали кредит бўлими бошлиғи Г.Даулетиярова, Кегейли тумани “Бир дарча” маркази сектор бошлиғи А.Досымбетовлар ва тумандаги касб-ҳунар коллежи битирувчилари иштирок этишди.

Кегейли туманида 6 та касб-ҳунар коллежларидан 52 нафар битирувчилари ўз бизнес ғояларини 35 дан ортиқ корхона ташкилотлар ҳамда туман ҳокимлигининг иқтисодий мажмуаси таркибидаги тижорат банклари, молия, солиқ идоралари, бандликка кўмаклашиш маркази ва манфаатдор ташкилотларга намойиш этишди. Тадбирда иштирок этган таълим муассасаларини битираётган лойиҳа ташаббускорлари ўз бизнес лойиҳаларининг қисқача таърифи – ижтимоий-иқтисодий муаммолар (вазифалар) ечими, мақсади, фойдаланувчилар аудиторияси (мижозлар), қиймати (ўз маблағлари, тижорат бинклари кредитлари, инвесторлар маблағлари), амалга ошириш муддатлари, лойиҳани амалга ошириш натижасида яратиладиган иш ўринлари ва бошқа маълумотларни ўз тақдимотларида намойиш этишди.

Ушбу тадбир ёшларни ўз бизнес ғоялари асосида ишлаб чиқилган лойиҳаларини қўллаб-қувватлаш орқали уларнинг тадбиркорлик фаолиятларини бошлашларига кўмаклашиш билан бирга бандлигини таъминлашга хизмат қилаётганлиги, айниқса, бизнес лойиҳаларини амалга оширишлари ҳисобига реал даромадларга эга бўлиш имконияти яратилганлиги иштирокчилар томонидан таъкидлаб ўтилди.

Кегейли тумани касб-хунар коллежи битирувчилар томонидан тижорат банклари ҳамда салоҳиятли инвесторлар, давлат ҳокимияти органлари вакилларига ўз лойиҳаларини намойиш этишлари ва ўз бизнесларини бошлашлари учун барча зарур шароит ва имкониятлар яратиб берилди.

“Старт-ап хафталиклари” – инновацион ғоялар танловининг туман босқичида энг яхши лойиҳалар ташаббускорларига тадбир ташкилотчилари томонидан қимматбаҳо совғалар ҳамда уларнинг тадбиркорлик фаолиятларини биринчи қадам сифатида яъни шу ернинг ўзидан бошлашлари учун тижорат банкларининг молиялаштириш тўғрисидаги махсус “Кредитлаш сертификатлари” билан тақдирланди.

Тадбир давомида 11 та коллеж  битирувчисининг   “Старт-ап”  лойиҳалари туман  Ишчи комиссияси томонидан муносиб бахоланди хамда уларга тижорат банкларининг молиялаштириш  тўғрисидаги “Кредитлаш сертификатлари” топширилди.

Тадбирнинг дастлабки натижалари шуни кўрсатмоқдаки, ўз бизнес ғоясини номоён этмоқчи бўлган ёшлар сони кун сайин ортиб бормоқда. Бу ўз навбатида ёшларнинг мамлакатимиз ривожи учун ўз ҳиссаларини қўшишлари билан бирга, ўзини ўзи банд қилиши ва реал даромад манбаига эга бўлишига хизмат қилади.