Ўзбекистон-Тожикистон бизнес-форуми бўлиб ўтди.

2017 йил 11 октябрь куни малакатимизда Тожикистон миллий маҳсулотлари кўргазмаси доирасида шунингдек, Ўзбекистон-Тожикистон бизнес-форуми ўтказилди.

Тадбир ташкилотчилари сифатида ўзбек томонидан Ўзбекистон Республикаси Ташқи савдо вазирлиги ва Савдо-саноат палатаси, тожик томонидан эса – Тожикистон Республикаси Инвестициялар ва давлат мулкини бошқариш давлат қўмитаси, Саноат ва янги технологиялар вазирлиги, “Тоджинвест” ДУК ҳамда Тожикистон ССП иштирок этди.

Икки давлат бизнес-доираларининг бизнес-форумида Ўзбекистон ва Тожикистоннинг 500 дан ортиқ тадбиркорлари қатнашди.

Таъкидлаш лозим, ташкил этилаётган тадбирлардан кўзланган мақсад икки давлат тадбиркорлари ўртасида савдо алоқаларини йўлга қўйиш ва кенгайтиришга кўмаклашиш, янги қўшма корхоналар сонини ва икки томонлама товар айланмаси ҳажмини оширишдан иборат.

2016 йил якунлари бўйича товар айланмаси – 197 млн.АҚШ долларини ташкил этган бўлса, биргина январ-сентябр ойларида – 178.2 млн.АҚШ долларини ташкил этди.

Ўзбекистон Республикасида Тожикистон Республикаси сармояси иштирокидаги 24 та корхона фаолият юритиб, улардан 1 таси Тожикистоннинг 100 % капиталига эга.

Ўз навбатида, Тожикистон ҳудудида Ўзбекистон Республикаси резидентлари иштирокидаги 9 та корхона ташкил этилган.

Бизнес форум доирасида 20 дан ортиқ шартномалар ҳамда 6 меморандум имзоланди шу жумладан, Ўзбекистон Савдо-саноат палатаси ва Тожикистон Савдо-саноат палаталари ўртасида Ишбилармонлар Кенгашини тузиш тўғрисидаги меморандумдир. 

Шу билан бирга, айни кунларда (11-13 октябрь) Ўзбекистонда Тожикистон маданият кунларига бағишланган тадбирлар ўтказилаётган бўлиб, уларнинг доирасида “Замонавий Тожикистон” фотокўргазмаси ҳамда халқ усталари маҳсулотларининг намойиши, Тожикистон ҳақидаги китоблар тақдимотлари, Тожикистон бадиий фильмлари намойиши ҳамда Тожикистон маданият ва санъат ходимларининг концерт дастури ташкил этилади.

Ўзбекистон Республикаси ва Тожикистон Республикаси ўртасидаги ҳамкорлик яқин қўшничилик, дўстлик ва ўзаро ҳурматнинг кўп асрлик анъаналари билан боғланган икки халқнинг туб манфаатларига хизмат қилиб, иқтисодий тараққиётда янги савдо йўлининг яратилишини кўзда тутади. Мувофиқ бизнес-доиралар ўртасидаги алоқалар ва маданий-гуманитар мулоқотнинг янада кенгайтирилиши икки мамлакатнинг қардош Халқлари ўртасидаги ўзаро қўшничлик ва дўстликнинг мустаҳкамланишига қўшимча маъно бағишлайди.

ЎзССП Ахборот хизмати