Ўзбекистон Савдо-саноат палатаси ва Испания Савдо палатаси ўртасида ҳамкорлик тўғрисидаги битим имзоланди.

Жорий йилнинг 13 ноябрида Ташқи ишлар вазири Абдулазиз Комилов бошчилигидаги Ўзбекистон делегацияси Мадрид шаҳрида Испаниянинг савдо бўйича Давлат котиби Мария Луиса Понсела билан учрашди. Томонлар, биринчи навбатда, савдо-иқтисодий ва инвестиция соҳаларидаги ҳамкорликни ривожлантиришнинг устувор йўналишларини муҳокама қилдилар.

Ташриф доирасида икки давлат компаниялари ва тадбиркорлик субъектларининг 120 га яқин вакиллари иштирокида Испания-Ўзбекистон бизнес-форуми ташкил этилиб, унда иқтисодиётнинг турли соҳаларига оид янги қўшма лойиҳаларнинг истиқболлари кўриб чиқилди.

Тадбир чоғида иштирокчилар Ўзбекистонда олиб борилаётган кенг кўламли иқтисодий ислоҳотлар, иқтисодиёт ва валюта бозорини либераллаштириш, ишбилармонлик муҳитини яхшилаш, бизнесни қўллаб-қувватлаш, кичик бизнес ва хусусий тадбиркорликнинг ҳуқуқлари ва қонуний манфаатларини ҳимоя қилиш, мамлакат иқтисодиётининг инвестициявий жозибадорлигини ошириш бўйича амалга оширилаётган чора-тадбирлар, шунингдек, ишлаб турган ва янгидан ташкил этилган махсус иқтисодиёт зоналарида чет эллик инвесторлар учун яратилган шароитларга оид маълумотлар билан танишдилар.

Форум якунида манфаатдор испан компанияларининг вакиллари билан «B2B» шаклида якка тартибдаги учрашувлар ўтказилиб, уларни қизиқтирган саволларга батафсил жавоблар тақдим этилиши билан бир қаторда, Ўзбекистонда бизнес юритиш имкониятлари тўғрисидаги маълумот етказилди.

Учрашувлар давомида тўқимачилик, фармацевтика, тиббиёт, озиқ-овқат ва қишлоқ хўжалиги соҳаларида қўшма лойиҳаларни амалга ошириш бўйича қатор дастлабки келишувларга эришилди. Бир вақтнинг ўзида, Ўзбекистон Республикаси ҳудудида иссиқхоналар қуриш соҳасидаги ҳамкорликнинг истиқболлари, Испанияга қайта ишланган мева-сабзавот маҳсулотлари етказиб берилишини йўлга қўйиш ҳамда Мадрид шаҳрида Ўзбекистон Савдо уйини ташкил этиш масалалари муҳокама қилинди.

Тадбир якунлари бўйича Ўзбекистон ва Испания ҳукуматлари ўртасида иқтисодиёт ва саноат соҳаларида ҳамкорлик тўғрисидаги меморандум, шунингдек Ўзбекистон Савдо-саноат палатаси ва Испания Савдо палатаси ўртасида ҳамкорлик тўғрисидаги битим имзоланди.

ЎзССП Ахборот хизмати