Самарқанд вилоятида тадбиркорлар билан учрашув бўлиб ўтди.

23 апрел куни Самарқанд вилоятида Ўзбекистон Республикаси Президенти Ш.М.Мирзиёевнинг 2018 йил 17-18 март куни Самарқанд вилоятига ташрифи давомида берган топшириқлари ва Пастдарғом туманида кенгайтирилган тарзда ўтказилган мажлис баёнида тадбиркорлик ва ишбилармонликни ривожлантириш бўйича белгиланган вазифалар ижросини таъминлаш, жумладан вилоятда тадбиркорлик субъектларининг фаолият кўрсатмаётганлик сабабларини ўрганиш ва уларга амалий ёрдам кўрсатиш, кам таъминланган оилаларни тадбиркорликка жалб қилиш бўйича “Хонқа тажрибаси”ни тадбиқ этиш ва доимий ишга жойлаштириш, бўш турган бино-иншоотлар ва ер майдонларидан самарали фойдаланишни йўлга қўйиш, вилоятда ҳунармадчиликни ривожлантириш ҳамда “Тошкент вилояти тажрибаси” мисолида мавжуд муаммоларни ҳал этиш юзасидан бир қатор муҳим вазифалар бўйича видеоселектор ўтказилди.

Йиғилишда давлатимиз раҳбари томонидан вилоятда тадбиркорликни ривожлантириш, уларнинг фаолиятидаги муаммоларни ечишда шаҳар ва туман секторлари раҳбарларининг масъулиятини ошириш, ҳар бир сектор раҳбари томонидан ҳудуддаги тадбиркорлар фаолиятида юзага келаётган масалалар ечимини топишда амалий ёрдам бериш, қўшимча ишчи ўринлари яратиш юзасидан аниқ вазифалар белгиланди.

Шунингдек, “Ўзбекистон Республикаси Президентининг 2018 йил 17-18 март куни Самарқанд вилоятига ташрифи давомида берган топшириқлари ва Пастдарғом туманида кенгайтирилган тарзда ўтказилган мажлис баёнида тадбиркорлик ва ишбилармонликни ривожлантириш бўйича берган топшириқлари ижросини таъминлаш тўғрисида”ги вилоят ҳокими қарорида кўзда тутилган қуйидаги 5 та масала мухокама қилинди:

• ҳар бир тадбиркорлик субъектининг фаолият кўрсатмаётганлиги сабабларини таҳлил қилиб, уларга фаолиятини тиклаш юзасидан амалий кўмак бериш;
• кам таъминланган оилаларнинг меҳнатга лаёқатли қатламини “Хонқа тажрибаси” мисолида тадбиркорликка жалб этган ҳолда, меҳнат билан бандлигини таъминлаш;
• бўш турган бино-иншоот ва ер майдонларини хатловдан ўтказиш, улардан самарали фойдаланишни ташкил этиш, бунинг ҳисобига қўшимча иш ўринлари яратиш;
• ҳунармандчиликни янада ривожлантириш;
• “Тошкент вилояти тажрибаси” мисолида мавжуд муаммоларни ҳал этиш бўйича тадбиркорлар билан бир ойда бир марта, шунингдек фуқаролар билан ўн беш кунда бир марта учрашувларни ташкил этиш тартибини жорий қилиш  ҳамда шаҳар ва туманлардаги 4 та секторларда амалга ошириш. 

Мазкур масалалар юзасидан Ўзбекистон Републикаси Савдо-саноат палатаси раиси ўринбосари Ж.Ураков томонидан вилоятда тадбиркорлик фаолиятини ривожлантириш бўйича аниқ таклифлар билдирилди.

Йиғилиш давомида шунингдек, “Тошкент вилояти тажрибаси” асосида тадбиркорларни муаммоларини ўрганиш, таҳлилини юритиш ва ҳал этиш бўйича Ўзбекистон Савдо саноат палатаси Ўзбекистон Республикаси Президенти ҳузуридаги тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакили билан ҳамкорликда 204 та тадбиркорларнинг ривожланишига тўсқинлик қилаётган муаммоли масалалар кўриб чиқилгани хақида маълумот берилди. Кўриб чиқилган масалалар қуйидаги асосий 6 та йўналиш бўйича таҳлил қилинди:

• 117 таси ёки 57 фоизи банк-молия, кредит, гаров таъминоти масалалари;
• 49 таси ёки 24 фоизи бўш турган бино-иншоотларни “нол” қийматда олиш, аукцион савдоларида иштирок этиш, ер ажратилиши;
• 21 таси ёки 10 фоизи коммуникация тизимига уланиш, архитектура ва қурилиш кадастр ҳужжатларини расмийлаштириш масалалари;
• 5 таси ёки 3 фоизи рухсатнома ва лицензиялар масалалари;
• 1 таси ёки 1 фоизи хом-ашё ресурсларни сотиб олиш, биржа савдоларга иштирок этиш;
• 11 таси ёки 5 фоизи бошқа масалалар ҳисобланади.

Ушбу масалаларни ечими устидан доимий мониторинг ўтказиб ва шу орқали масалаларни ҳал этиб борилишини йўлга қўйиш лозимлиги тўғрисида батафсил тўхталиб ўтилди. Тадбиркорлар томонидан билдирилаётган масалалар таҳлил қилиниши, уларнинг масъул ташкилотлар томонидан 4 та сектор раҳбарлигида мурожаатларни ўз вақтида ва қонуний ҳал этилиши юзасидан мониторинг юритилиши ва якуний хисобот Ўзбекистон Республикаси Президентига киритилиши таъкидланди.

Йиғилишнинг иккинчи қисмида вилоят ва туман студияларидан бевосита иштирок этаётган тадбиркорларнинг мурожаатлари эшитилди.

ЎзССП Ахборот хизмати