“Ҳар бир оила – тадбиркор” дастури ижроси Андижон вилояти Марҳамат тумани мисолида

Маълумки, Ўзбекистон Республикаси Президенти Ш.Мирзиёев 2018 йилнинг 7 июн куни “Ҳар бир оила – тадбиркор” дастурини амалга ошириш тўғрисидаги Қарорни имзолади. Ушбу дастур меҳнат билан банд бўлмаган аҳолини тадбиркорлик, ҳунармандлик, фермерлик, касаначиликка ўргатиш орқали уларга даромад манбаи яратиб беришга қаратилган.

Қарорга кўра, ҳар бир оиланинг тадбиркорлик билан шуғулланиши ва барқарор даромад манбаига эга бўлиши учун шарт-шароитлар яратиш мақсадида мамлакатимизнинг ҳар бир туман ва шаҳрида, энг аввало, олис ва табиий-иқлим шароити оғир ҳудудларда аҳолининг моддий шароитларини тубдан яхшилаш, турмуш тарзи сифати ва даражасида сезиларли ижобий ўзгаришлар амалга оширилишини таъминлаш белгиланган.

Мазкур дастур доирасида амалга оширилаётган ишларни мувофиқлаштириш бўйича ташкилий ишчи гуруҳлар ташкил этилди.

Унга мувофиқ 1-Республика Ишчи гурухи раҳбари этиб Ўзбекистон Савдо-саноат палатаси раиси ўринбосари Ў.Бўтаев тайинланган бўлиб, бир қатор ваколатли вазирликлар ва идоралар ҳамда маҳаллий хокимият вакиллари билан ҳамкорликда Андижон вилояти Марҳамат туманида тадбиркорлар билан учрашувлар ўтказилди. Унда 100 дан ортиқ тадбиркорлар субъектлари иштирок этди.

Учрашувда тадбиркорлик билан шуғулланиш истагида бўлган аҳолига имтиёзли кредитлар ажратиш, тадбиркорлик ва даромад келтирадиган меҳнат фаолияти билан шуғулланмаган аҳолига тадбиркорлик кўникмаларини ўргатиш, касаначилик ва кичик ишлаб чиқарувчи субъектларни ташкил этиш, тажрибали тадбиркорларни маҳаллаларда янги бизнес фаолияти билан шуғулланишни бошлаган оилаларга бириктириш, қишлоқ ва маҳаллаларда бўш турган ер майдонларини янги ташкил этилаётган оилавий тадбиркорлик субъектларига бериш масалалари атрофлича муҳокама қилинди.

Ушбу дастурнинг амалга оширилиши, айниқса, қишлоқ жойларда оилавий бизнес ва тадбиркорликни ривожлантиришга, аҳоли фаровонлигини янада юксалтиришга хизмат қилади.

ЎзССП Матбуот хизмати