Сирдарё вилоятида тадбиркорлик субъектлари билан учрашув бўлиб ўтди

Жорий йилнинг 20 июл куни Сирдарё вилоятининг Сирдарё шаҳрида “Мамлакатимизда кичик бизнес ва тадбиркорликнинг жадал ривожланишини таъминлаш, хусусий мулкни ҳар томонлама ҳимоя қилиш борасида амалга оширилаётган ишлар, мавжуд муаммолар ҳамда уларни бартараф этиш” мавзусида Ўзбекистон Республикаси Прокуратураси Сирдарё вилоят прокуратураси томонидан учрашув ташкил этилди.

Учрашувдан кўзланган мақсад - вилоятда фаолият кўрсатувчи тадбиркорлик субъектларининг мавжуд муаммоларини ўрганиш, вилоятининг тадбиркорлик салоҳиятини янги босқичга олиб чиқиш, бу борадаги имкониятлардан оқилона фойдаланиш ҳамда тадбиркорлик фаолиятини бошлаш истагида бўлган шахслар билан мулоқот олиб боришдан иборат.

Мазкур учрашувда Ўзбекистон Савдо-саноат палатаси, Сирдарё вилоят ҳокимлиги, туман солиқ инспекцияси, божхона ходимлари ва бир қатор давлат органлари вакиллари иштирок этишди. Шунингдек, Ўзбекистон Савдо-саноат палатаси раиснинг биринчи ўринбосари И.Жасимов, тадбиркорларнинг ҳуқуқий онгини  ва билимини ошириш ҳамда уларнинг ҳуқуқий ҳимоясини кучайтириш механизми ҳақида маъруза қилди. 

Учрашув сўнггида тадбиркорлар томонидан билдирилган муаммолар ва таклифлар ўрганилиб, уларнинг ижросини таъминлаш бўйича вилоятнинг махсус чора-тадбирлар дастури белгилаб олинди.

ЎзССП Матбуот хизмати