“Коррупция – миллий хавфсизликка таҳдид” мавзусида семинар ташкил этилди

Бугун 27 июл куни Ўзбекистон Республикаси Савдо-саноат палатасида “Коррупция – миллий хавфсизликка таҳдид” мавзусида семинар ўтказилди.

Семинар он-лайн видеоконференция шаклида ўтди. Унда Ўзбекистон Савдо-саноат палатаси мутахассислари ва Ҳудудий бошқармалари ходимлари иштирок этди.

Ўтказилаётган йиғилишнинг бош мақсади – Палата ходимларига коррупция тушунчаси моҳиятини, бу иллат давлатимиз иқтисодиёти ва ижтимоий ҳаётда туғдираётган хавфини етказиш, ходимларда коррупцияга нисбатан қатъий муросасиз ва қабул қилмаслик муносабатни шакллантириш, тизимда шаффофлик ва тозалик, коррупциянинг ҳар қандай кўринишларига йўл қўймаслик муҳитини яратиш, тадбиркорлар ўртасида ушбу йўналишда доимий равишда профилактика ишларини олиб боришдан иборат.

Тадбирда Ўзбекистон Савдо-саноат палатаси раисининг биринчи ўринбосари И.Жасимовнинг “Коррупция – миллий хавфсизликка таҳдид” мавзусидаги маърузаси тингланди.

Ҳусусан, "Коррупцияга карши курашиш тўғрисида"ги Қонуннинг қабул қилинганлиги, унда коррупцияга нисбатан муросасиз муносабатларни қарор топтириш борасидаги қоидалар, хуқуқлар ва мажбуриятлар мустаҳкамланганлигини таъкидлаб ўтди.

Шуни таъкидлаш лозимки, Ўзбекистон Савдо-саноат палатаси, Бош прокуратура ҳамда Европа хавфсизлик ва ҳамкорлик ташкилоти ўзаро ҳамкорлигида амалга оширилиши бошланган лойиҳа бу борада қўйилган яна бир мухим қадам бўлди.

Ушбу ташкилотлар томонидан биргаликда ўтказиладиган семинарларда "Ўзбекистон ҳусусий секторида коррупцияга қарши курашишга кўмаклашиш" деб номланган ушбу лойиҳани ҳаётга тадбиқ этиш чоралари ҳусусида сўз юритилди.

Иштирокчиларга коррупцияга қарши курашиш бўйича республика идоралараро комиссиясининг 2018 йил 7 июндаги 4-сонли йиғилиши баённомаси тасдикланганлиги ва унинг ижросини таъминлаш борасида амалга ошириладиган ишларга ҳам тўхталиб ўтилди.

Шу билан бирга, ЎзССП ходимлари ўртасида одоб-аҳлоқ қоидаларига риоя этиш, коррупция билан боғлиқ қонунбузарлик ҳолатларини ўз вақтида аниқлаш, уларнинг олдини олиш ва бартараф этишга оид масалалар юзасидан тегишли таклиф ва тавсиялар берилди.

Палата тизимида коррупцияга нисбатан муросасиз муносабатни шакллантириш, очиқлик ва ошкораликни таъминлаш, тадбиркорлик субъектларига алоҳида эътибор қаратиб, уларнинг коррупция йўлига кирмаслигининг олдини олиш, бизнес ҳамжамиятида бундай иллатга қарши курашиш бўйича тегишли вазифалар белгилаб олинди.

ЎзССП Матбуот хизмати