Тадбиркорлик субъектлари Ўзбекистон Савдо-саноат палатасининг ишончли ҳимоясида

Ўзбекистон Республикаси Савдо-саноат палатаси ва унинг ҳудудий бошқармалари Палата тўғрисидаги Қонун билан берилган ваколатлардан самарали фойдаланиб, тадбиркорларнинг ҳуқуқлари ва қонуний манфаатларини ҳимоя қилиш борасида кенг қамровли ташкилий ва амалий ишларни олиб боришмоқда. Бундай сайъи-ҳаракатлар самарасини яқин кунларда тадбиркорга кўрсатилган амалий ёрдам мисолида кўришимиз мумкин:

Тошкент вилояти Янгийўл туманида фаолият юритаётган “ASR SAHOVAT FAYZ ” фермер хўжалиги 16.04.2016 йилда Янгийўл тумани газ ташкилоти билан тузилган шартномага асосан табиий газ харид қилиб ғишт ишлаб чиқариш фаолиятини олиб борган. 30.05.2018 йилда Тошкент вилояти Янгийўл тумани МИБ ходимлари Ж.Асланов ва А.Махмудовлар Янгийўл туман газ таъминот ташкилоти мутаҳассислари иштирокида хўжаликда тезкор текшириш натижасида “ASR SAHOVAT FAYZ” ФХ тасарруфидаги газ хисоблагичнинг “Техник шарт”да кўрсатилган максимал соатлик газ сарфига мос келмаслиги ҳолати аниқланган ва №МИБ TV GH-0001690-сонли далолатнома тузилган ҳамда ушбу асосида ФХдан 2016-2018 йиллар мобайнида  фойдаланилган газ ҳажми учун  809.8 млн.сўм қўшимча тўлов ҳисобланган.

“ASR SAHOVAT FAYZ” ФХ раҳбари Р.Валиевнинг МИБ мансабдор шахслари ҳатти-харакатлари устидан ёзган аризаси Тошкент вилояти Янгийўл туман маъмурий судида кўриб чиқилиб, суднинг 28.06.2018 йилдаги ажрими билан Р.Валиевнинг дастлабки ҳимоя чорасини қўллаш ҳақидаги талаби қаноатлантирилган ва МИБ Янгийўл туман бўлими мансабдор шахсларининг Фермер хўжалигидан қарздорликни ундиришга қаратилган ҳатти-харакатлари мазкур маъмурий иш мазмунан кўрилгунга қадар тўхтатилган.

Шунингдек, мазкур суднинг 16.07.2018 йилдаги хал қилув қарори билан Тошкент вилояти МИБ Янгийўл тумани бўлими мансабдор шахсларининг 30.05.2018 йилда TVGH-0001690-сонли далолатномани тузганликда ифодаланган ҳатти-харакатлари ғайриқонуний деб топилган.

Тошкент вилояти Янгийўл туман маъмурий судининг 16.07.2018 йилдаги қарорига нисбатан Янгийўл туман прокуратураси томонидан апелляция тартибида протест киритилган бўлиб, иш ҳужжатлари 27.09.2018 йил куни апелляция тартибида Тошкент вилояти маъмурий судида кўриб чиқилган. Мазкур процессда томонлар билан бир қаторда “ASR SAHOVAT FAYZ” ФХ раҳбари Р.Валиевнинг жамоатчилик ҳимоячиси сифатида Савдо-саноат палатаси ишончли вакили Б.Ибадуллаев ҳам қатнашган ва суд жараёнида кўрилаётган масала юзасидан ўз фикр-мулоҳазаларини билдирган ҳамда тадбиркорга ҳуқуқий ёрдам бериб келган.

Суд жараёнида ишдаги ҳар бир ҳолат яна бир бор синчковлик билан ўрганиб чиқилиб, шунингдек Палата масъул ходими Б.Ибадуллаевнинг фикрлари ҳисобга олинган ҳолда “ASR SAHOVAT FAYZ” ФХ раҳбари Р.Валиев фойдасига қарор чиқарилган ҳамда Янгийўл туман маъмурий суднинг 16.07.2018 йилдаги хал қилув қарори ўзгаришсиз қолдирилган ва келтирилган апелляция протестни қаноатлантириш рад этилган.

Мазкур ҳолатда Палата ходимининг бевосита фаол иштироки натижасида ишлаб чиқариш билан шуғулланаётган яна бир тадбиркорнинг фаолияти тикланди ва унинг раҳбарлиги остидаги ўнлаб фуқаролар ўз ишчи жойларини сақлаб қолдилар. 

Ўз ССП Ахборот ҳизмати t.me/uzchamber