Demo Day: «Стартап-ташаббуслар-2018» Дастурининг финал иштирокчиларини кутиб олинг.

Ёшларнинг стартап-ташаббусларини қўллаб-қувватлаш дастурининг учинчи даври «Demo Day» махсус тадбири билан якунланади. Ушбу Дастурда 16та жамоа ўз лойиҳаларини тақдим қилади. «Demo Day» якуни бўйича энг яхши деб топилган бешта лойиҳа ўз ғояларини ривожлантириш учун беминнат инвестиция шаклидаги пул мукофотларига эга бўладилар.

Хусусан, ариза юборган 510 жамоадан 92 таси Дастурда иштирок этиш учун саралаб олинди. 16 та жамоа якуний учинчи даврга муваффақиятли ўтиб, ўз стартап-лойиҳаларини «Demo Day» тадбиридаги салоҳиятли инвесторлар ва манфаатдор ташкилотларга тақдим қилиш имкониятини қўлга киритдилар.

Жорий йилда таълим соҳасига оид лойиҳалар, виртуал реалликка асосланган савдо майдончалари, стартаплар ва бошқа лойиҳалар учун краудфандинг платформалари, бионик протезни ишлаб чиқариш бўйича хизматлар, савдо ва умумий овқатланишни бошқаришнинг автоматлашган тизимлари ҳамда тиббиёт, реклама, туризм соҳасидаги бошқа лойиҳалар тақдим этилади.

«Demo Day» тадбирида намойиш этилган стартап-лойиҳалар «Стартап-ташаббуслар» Дастури иштирокчиларининг узоқ давом этган меҳнати самарасидир. Дастур давомида жамоаларнинг етакчилари ва аъзолари трекерлар (шахсий мураббийлар) раҳбарлиги остида ўз назарияларини синовдан ўтказиб, минимал иш моделларини яратдилар ва уларни амалиётда текшириб кўрдилар, мақсадли аудиторияни ўрганиб, қайта жавобларга эга бўлдилар, дастлабки «қўл» савдосини синаб кўрдилар, лойиҳанинг камчиликларини таҳлил қилиб, уни такомиллаштирдилар.

Дастурни амалга ошириш давомида жамоалар «тежамкор стартап» (Lean Startup) методологиясини тушунтириш, ғояни ривожлантириш ва муваффақиятли бизнесга айлантириш асосларини ўрганишга қаратилган беш кунлик амалий семинарда иштирок этдилар.

Бунга қўшимча равишда малакали экспертлар иштирокидаги маҳорат мактаблари, жумладан Ўзбекистон ва Россиянинг етакчи экспертлари иштирокида тақдимотларни тайёрлаш бўйича тренинг ўтказилди.

Бу йилги «Demo Day» тадбирида қуйидаги лойиҳалар тақдим этилади:

Little Big Media – рақамли рекламани жойлаштириш учун супермаркетларда самарали майдончани тақдим этишга доир хизмат. Майдон экран (7-8 дюйм) ўрнатилган гаджетдан ҳамда супермаркет харидорларининг смартфонларини қувватлантириш имконидан иборат. Гаджет харидор аравачасининг тутқичига маҳкамланади.

UZCOMMERCE – Ўзбекистондаги кичик ва ўрта тўқимачилик бизнеси учун мўлжалланган В2В электрон савдо майдончаси.

BitStreem – тараққиёт кузатиб бориш учун мўлжалланган ва онлайн мусобақалардан иборат машина ёрдамида ўқитувчи интерактив таълим тизими.

M-POS – дўконлардаги маҳсулотларнинг ҳаракатини рўйхатга олиш учун ишлаб чиқилган мобил илова. Бу – омборхона ҳисоби ва савдони автоматлаштириш содда ечими бўлиб, кичик бизнесда зарур бўлган барча функцияларга эга: омбор назорати, контрагентлар базаси, савдо операциялари ва ҳисоботлар.

Бионик қўлни ишлаб чиқариш – бионик протезни ишлаб чиқариш ва сотишга оид хизмат. Бионик протез, бу – йўқотилган органнинг ишини тузилмавий ва функционал жиҳатдан қайтарувчи сунъий орган.

UzTrucks – юк ташиш машиналари ҳайдовчилари учун тегишли юкларни топишга, шунингдек кичик ва ўрта корхоналарнинг менежерларига ҳамёнбоп нархларда юкларни етказиб бера оладиган таъминот хизмати вакилларини топишга ёрдам берадиган онлайн-платформа.

Enaga – mening sevimli enagam – энага хизматларини тақдим этувчи хизмат.

Startupmarket.uz – краудфандинг учун стартаплар каталоги.

UniBus — инновацион технология бўлиб, ичидаги микроназоратчилар ёки микропроцессорлар, шунингдек нейрон тармоқлар орқали ишлайдиган ақлли камераси ёрдамида йўловчилар оқимини ҳисоблаш, кун давомида жамоат транспортида қўлланиладиган малумотлар статистикасини юритиш имконини беради.

Subscription.uz – қўллаш осон бўлган пуллик обуналар В2В хизмати. Хизмат мижозлар билан ишлаш ва тўловларни бошқариш вазифаларини ўзига олиб, ҳамкорларга содда интеграция, обуна шартларининг қулай созланиши, мижоз бутун мулоқотни брендлаштириш имконияти ва таҳлили ҳисоботларни тақдим этади.

Campaign – Ўзбекистон учун Crowdfunding. Ижтимоий ва тадбиркорликка оид лойиҳаларни молиявий қўллаб-қувватлаш.

ERES – умумий овқатланиш соҳасидаги бизнесни симсиз автоматлаштиришдир. Фойдаланувчи бизнесини маҳсулотларни харид қилишдан тортиб то мижоз билан кассада ҳисоб-китоб қилингунича назорат қилади.

Tashxis.uz – барча тоифадаги шифокорлар ва беморларни бирлаштирувчи ҳамда ортиқча вақт ва маблағ сарфланишини қисқартирувчи портал. Беморнинг ўзи 80 фоиз аниқлик билан ташхис қўйиб, уйидан чиқмасдан тегишли шифокор билан боғланиши мумкин.

VR Emporium — виртуал ва қўшимча реалликка асосланган савдо-кўнгилочар маркази. Мижозга иккита версия таклиф қилинади: виртуал реалликдаги Интернет-дўкон, қўшимча реалликка асосланган мобил илова (мижознинг хоҳиши билан яратилади).

Kontrakt.uz – шартнома асосида таълим олаётган талаблар учун вақт ва маблағни тежашга қаратилган дастур. Дастурий таъминот шартнома бўйича қарздорликни билиш, тўлаш ва тўловларни олиш имконини беради. Дастурий таъминот онлайн, Android платформасида ишлайди ва электрон тўлов тизимлари билан интеграцияланган.

BeGuest – Android ва веб-сайт учун мўлжалланган онлайн илова. Дастур маҳаллий ва хорижлик сайёҳлар учун қўшимча хизматларни тақдим этади.

***

«Стартап-ташаббуслар» Дастури 2016 йилдан буён амалга оширилади ва ёшларни ўз стартапларини яратишда ҳамда тадбиркорлик кўникмаларини ривожлантиришда қўллаб-қувватлашга йўналтирилган. Дастур БМТТД, Савдо-саноат палатасининг қўшма фаолияти маҳсулоти ҳисобланиб, жорий йил «Ёшлар-келажагимиз» давлат дастурининг вазифаларини бажариш доирасида Инновацион ривожланиш вазирлиги, Ўзбекистон ёшлар иттифоқи ҳамкорлигида, шунингдек Буюк Британиянинг Ўзбекистондаги Элчихонаси молиявий кўмагида амалга оширилмоқда.