Тадбиркорлар учун яна бир имконият.

Тошкент шаҳри Юнусобод тумани ҳокимлигида тадбиркорлар томонидан ишлаб чиқарилган халқ истеъмоли молларини ички ҳамда ташқи бозорга етказиб беришда тадбиркорларга қулайлик яратиш, бунда жаҳон бозорига мос электрон савдо тизими тартиб-тамойилларига бағишланган бизнес-тренинг ташкил этилди.

Ўзбекистон Савдо-саноат палатаси Тошкент шаҳар ҳудудий бошқармаси, шаҳар ва туман ҳокимликлари томонидан ўтказилган тадбирда шу соҳалардаги масъул вакиллар, тадбиркорлар, “Ўзстандарт” агентлиги ва “Ўзбекистон почтаси” акциядорлик жамияти ходимлари иштирок этди.

– Бугунги ўқув тадбиркорларни қўллаб-қувватлаш ва улар ишлаб чиқараётган халқ истеъмоли молларининг савдосини ташкил этишда замонавий услублардан кенг фойдаланиш бўйича зарур маълумотлар бериш, уларнинг бу борада билим ва малакасини оширишга қаратилган, – деди Ўзбекистон Савдо-саноат палатаси Тошкент шаҳар ҳудудий бошқармаси Юнусобод тумани бўлинмаси Тадбиркорларга кўмаклашиш маркази директори Алишер Алохутдинов. – Унда “Zoodmall“ электрон тизимининг афзалликлари ҳақида батафсил маълумот берилди. Мазкур тизим тадбиркорлар ишлаб чиқараётган маҳсулотлар савдосини ташкил этиш, ички ва ташқи бозорга чиқариш учун қулай замонавий усулдир. Бундай савдонинг ўзига хос талаблари бўлиб, агар маҳсулотлар оғирлиги 30 килограммдан кам бўлса, почта орқали, 30 килограммдан ортиқ бўлса, логистика йўли билан етказиб бериш имконияти яратилган. Яна бир эътиборли жиҳати, айнан шу тизим савдо-сотиқ назоратини ҳам амалга ошириб боради.

Бизнес-тренинг Тошкент шаҳрининг барча туманларида бўлиб ўтади.

Уза