Ҳакамлик судларига тадбиркорлар ишончи ортмоқда.

Мамлакатимизда тадбиркорлик, тижорат ва хусусий секторга нисбатан муносабатларни тубдан ўзгартириш, уларнинг ҳуқуқларини поймол қилинишига йўл қўймаслик, қонуний манфаатлари ҳимоясини таъминлашга қаратилган ҳуқуқий ҳимоя қилиш тизими шакллантирилди ва унинг ташкилий механизми такомиллашиб бормоқда. Бу борада низоларни муқобил ҳал этишда асосий нодавлат орган сифатида фаолият юритиб келаётган Ҳакамлик судларининг ўзига хос ўрни бор.

Шунинг учун ҳам ЎзР ССП Ижроия қўмитасининг қарори билан тадбиркорлик субъектлари ҳуқуқий ҳимоясини кучайтириш, низоларни ҳал қилишнинг муқобил усулларидан кенг фойдаланиш, палата аъзолари ва ходимларининг бу борадаги ҳуқуқий билимларини ошириш мақсадида Палата тизимида ҳар ойнинг сўнгги сешанба куни "Ҳакамлик суди" куни деб белгиланган.

Шу муносабат билан 2019 йил 11 апрель куни Палата раисининг биринчи ўринбосари И.К.Жасимов раислигида видео-конференция ташкил қилинди. Унда палата тизимидаги барча Ҳакамлик судларининг раислари ва судьялари, ҳудудий бошқармалар бошлиқлари, юридик хизмат ходимлари иштирок этишди.

Ўзбекистон Республикаси Савдо-саноат палатаси ва унинг ҳудудий бошқармалари ҳузурида ташкил қилинган Ҳакамлик судлари томонидан олиб борилаётган ишлар натижасида уларга даъво аризалари билан мурожаатлар сони йилдан йилга кўпаймоқда.

Видео-конференцияда вилоятлар ҳудудий бошқармалари ҳузуридаги Ҳакамлик судларининг 2019 йил биринчи чорагида кўрилган ишлари тўғрисидаги ахборотлари тингланди, бу соҳадаги мавжуд муаммолар ва уларни бартараф қилиш, шунингдек Ҳакамлик судоари фаолиятини янада такомиллаштиришга қаратилган таклиф ва тавсиялари  муҳокама қилинди.

Ўзбекистон Республикаси Савдо-саноат палатаси ва унинг ҳудудий бошқармалари ҳузурида ташкил қилинган Ҳакамлик судлари томонидан 2018 йил биринчи чорагида жами 834 та ишлар ҳал қилинган бўлиб, даъво суммаси 104 млрд. сўм, 1 399,9 минг. АҚШ долларини ташкил қилган бўлса, 2019 йилнинг 1 чорагида 1726 та ишлар келиб тушган бўлиб, даъво суммаси 30,5 млрд. сўм, 31,5 минг.АҚШ доллари, 875 минг Еврони ташкил қилган. Бу 2018 йил биринчи чорагида кўрилган ишлар сонига нисбатан икки баравардан, яъни 892 тага кўпдир.

Айниқса, Савдо-саноат палатасининг Наманган (398 та иш кўрилган), Самарқанд (208 та), Хоразм (195 та) вилоят ҳудудий бошқармалари ҳузуридаги Ҳакамлик судларида кўрилган ишлар сони кескин ошган.

Тадбирда сўзга чиққанлар Ҳакамлик судини ривожлантириш бўйича ва йўл қўйилган камчиликларни баратараф қилиш бўйича ўз фикр-мулоҳазаларини билдирдилар. Хусусан, Ҳакамлик судлари тўғрисидаги норматив-ҳуқуқий ҳужжатлар ва локал ҳужжатларнинг мазмуни, моҳияти ва аҳамиятини кўргазмали воситалар орқали тушунтириш; тадбиркорлик субъектлари ўртасида юзага келган низоларни Ҳакамлик судларида ҳал қилишнинг афзалликлари ва ўзига хос хусусиятларини оммавий ахборот воситаларида мунтазам ёритиш; Ҳакамлик судлари билан иқтисодий суд ва фуқаролик ишлари бўйича судлар ҳамкорлигида семинарлар ташкил қилиш; Ҳакамлик судлари моддий-техника базасини мустаҳкамлаш лозимлигини таъкидланди.

Тадбир иштирокчилари якдиллик билан Ҳакамлик судлари ўз фаолиятини қонунийлик, мустақиллик, ҳакамлик муҳокамаси маълумотларининг ошкор қилинмаслиги, ҳакамлик судьяларининг холислиги, диспозитивлик, ҳакамлик муҳокамаси тарафларининг тортишуви ва тенг ҳуқуқлилиги каби приципларига риоя қилган ҳолда амалга оширишини эътиборга олиб, жорий йилда уларда кўриладиган ишлар сонини камида икки бараварга ошириш мақсадга деган хулосага келдилар.

Ўз ССП Ахборот хизмати