"Ташаббус 2019" кўрик танловининг республика босқичининг очилиш маросими бўлиб ўтди.

 Мамлакатимиз иқтисодиётини тубдан таркибий ўзгартириш, қисқа муддатда янги-локомотив ролини бажарадиган тармоқларни барпо этиш, ишлаб чиқаришни модернизация қилиш, замонавий бозор инфратузилмасини шакллантириш борасида ўз вақтида бошланган ва узоқ истиқболга мўлжалланган ишларимиздан бири тадбиркорлик субъектларини ҳар томонлама қўллаб-қувватлаш ва рағбатлантиришдир. Шубҳасиз, ушбу муваффақиятларда тадбиркорлар, фермерлар ва ҳунармандлар ўртасида анъанавий ўтказиб келинаётган “Ташаббус” кўрик-танловининг ҳиссаси ҳам беқиёсдир. 

“Ташаббус” кўрик-танлови Ўзбекистон Республикаси Президенти соврини учун тадбиркорлик субъектлари ўртасида 24 йилдан буён ўтказилиб келинаётган ягона танлов эканлиги билан ажралиб туради ва 2018 йилдан ушбу танловнинг формати ҳам ўзгартирилди.

Кўрик-танлов қуйидаги 5 та асосий номинациялар бўйича ўтказилади ва танлов республика босқичи мутлақ ғолиблари Ўзбекистон Республикаси Президенти соврини “Chevrolet-Spark” автомашиналари билан тақдирланадилар:

1. “Саноат соҳасида йилнинг энг яхши тадбиркори”;

2. “Хизмат кўрсатиш соҳасида йилнинг энг яхши тадбиркори”;

3. “Йилнинг энг яхши ёш тадбиркори”;

4. “Йилнинг энг яхши фермери;

5. “Йилнинг энг яхши ҳунарманди”.

Ҳар бир босчқичда кўрик-танловнинг асосий йўналишлар бўйича 1, 2, 3-ўрин ғолиблари аниқланди.

Бундан ташқари кўрик-танлов республика ташкилий қўмитасининг қарорига асосан танлов иштирокчилари қуйидаги қўшимча номинацияларда ҳам иштирок этишади:

• “Энг яхши тадбиркор аёл”;
• “Энг яхши инновацион лойиҳа”;
• “Ёшларга энг кўп иш жойи яратган тадбиркор”;
• “Энг яхши оилавий бизнес соҳиби”;
• “Энг яхши экспортчи”;
• “Йилнинг энг яхши маҳсулоти”;
• “Менинг юртим – менинг ифтихорим”;
• “Энг масъулиятли ижтимоий шерик”;
• “Энг яхши кўргазма намойиши учун”;
• “Энг намунали солиқ тўловчи”;
• “Туризм соҳаси ривожига қўшган ҳиссаси учун” каби номинациялар.

Шунингдек, мазкур қўшимча номинициялар бўйича ғолибликни қўлга киритган иштирокчилар ташкилотчилар томонидан махсус қимматбаҳо совринлар ва “Ташаббус” кўрик-танлови ташкилий қўмитасининг дипломи билан тақдирланадилар.

Фармойишга асосан кўрик-танловнинг туман (шаҳар) босқичлари жорий йилнинг 20 апрелидан 15 майига қадар, Қорақалпоғистон Республикаси, вилоятлар ва Тошкент шаҳар босқичи эса 20 майдан 12 июнга қадар ўтказилди.

Республиканинг барча ҳудудларидан жами 6 712 нафар туман (шаҳар) тадбиркорлик субъектлари ўз маҳсулотлари ва хизматлари билан иштирок этишди ва фармойиш билан белгиланган асосий номинациялар бўйича беллашди.

Шундан Қорақалпоғистон Республикаси, вилоятлар ва Тошкент шаҳар 960 нафар тадбиркор, фермер ҳамда ҳунармандлар иштирок этиш имкониятини қўлга киритишди.

Мазкур босқичда иштирок этган тадбиркорлик субъектларининг 69 нафари кўрик-танловнинг республика босқичида қатнашиш ва Ўзбекистон Республикаси Президент совринини қўлга киритиш имкониятига эга бўлишди. 42 нафари тадбиркорлик субъектлари, 14 нафари ҳунарманд ҳамда 13 нафари фермерлар республика босқичида иштирок этишмоқда.

Жорий йилнинг 20-21 июнь кунлари “ЎзЭкспомарказ” Миллий кўргазмалар маркази 3-павильонида кўрик-танлов республика босқичининг очилиш маросими ва кўргазмаси бўлиб ўтди.

Очилиш маросимида бир қатор вазирлик, идоралар Тошкент шаҳар ва туман ҳокимлиги масъуллари, Ўзбекистон Савдо-саноат палатаси ходимлари, кенг жамоатчилик ҳамда дипломатик корпус вакиллари иштирок этишди.

Тадбирни Ўзбекистон Савдо-саноат палатаси раиси А.Икрамов очиб берди.

Тадбиркорлик фаолиятига қизиқишларни шакллантириш мақсадида кўрик-танлов кўргазмаларига маҳаллий аҳоли вакилларининг ташрифи йўлга қўйилди.

Бундан ташқари Ўзбекистон Савдо-саноат палатаси томонидан "Тадбиркорлик субъектлари учун улар томонидан содир этилиши мумкин бўлган ҳуқуқбузарликлар профилатикаси ҳамда коррупцияга қарши курашиш бўйича ўтказиладиган очиқ семинарлар дастури" ишлаб чиқилган бўлиб, "Ташаббус-2019" кўрик-танловининг республика босқичининг очилиш ва кўргазмаси доирасида иштирок этувчи тадбиркорлик субъектлари учун ўқув семинарлар ўтказилди. 

Танлов доирасида ташкил этилган кўргазмада тадбиркорлар ўзларининг фаолият йўналишига тегишли бўлган кўргазмавий махсулотлари билан, фермерлар озиқ-овқат ҳамда ҳунармандлар томонидан эса ясалган миллий-анъанавий маҳсулотларини намойиш этилмоқда.

22 июнь куни “Наврўз” ресторанида республика босқичи ғолибларини тантанали тақдирлаш ва уларга Ўзбекистон Республикаси Президентининг олий соврини “Chevrolet Spark” автомашиналарини топшириш маросимлари бўлиб ўтади.   

Ўз ССП Ахборот хизмати