"Солиқ ислоҳотларининг навбатдаги босқичи: солиқ ва божхона имтиёзлари берилишини янада такомиллаштириш”

3 июль куни “УзЭкспомарказ” биносида "Солиқ ислоҳотларининг навбатдаги босқичи: солиқ ва божхона имтиёзлари берилишини янада такомиллаштириш” мавзусида Халқаро пресс-клубнинг навбатдаги сессияси бўлиб ўтди.

Халқаро пресс-клубда Ўзбекистон Савдо-саноат палатаси раиси А.Икрамов, Ўзбекистон Республикаси Давлат солиқ қўмитаси раиси Б.Мусаев, Ўзбекистон Республикаси Молия вазири ўринбосари Д.Султанов, Ўзбекистон Республикаси инвестициялар ва ташқи савдо вазири С.Умирзаков  ва бир қатор йирик тадбиркорлик субъектлари эксперт сифатида иштирок этишди. 

Сўзга чиққанлар Фармоннинг асосий мазмун моҳияти мамлакатимизда рақобатбардош ишлаб чиқаришни рағбатлантириш, тадбиркорликни ва соғлом рақобат муҳитини қўллаб-қувватлаш, мамлакатнинг экспорт салоҳиятини кенгайтириш ва рағбатлантириш ҳамда ички бозорни сифатли истеъмол товарлари билан таъминлашга йўналтирилган солиққа тортиш ва божхона-тариф тизимини тартибга солишнинг самарали тизимини шакллантиришга қаратилган кенг қамровли ишларнинг давомийлигини таъминлашга қаратилганлигини алоҳида қайд этишди.  

Шунингдек тадбир давомида, бож тарифларининг тартибга солиш функцияларини иқтисодиёт тармоқларини ривожлантиришнинг қўшилган қиймат глобал занжирига уйғун интеграциялашувга йўналтирилган устуворликларидан келиб чиққан ҳолда кучайтириш, ташқи иқтисодий фаолиятни тариф жиҳатдан тартибга солиш тизимини илғор хорижий тажрибани, халқаро принциплар ва нормаларни инобатга олган ҳолда такомиллаштириш, маҳаллий ишлаб чиқарувчиларни республикада ишлаб чиқарилмайдиган ёхуд етарли бўлмаган ҳажмда ишлаб чиқариладиган ҳамда экспортга йўналтирилган маҳсулот ишлаб чиқаришда фойдаланиладиган хомашё ва материаллар билан таъминлаш учун шарт-шароитлар яратиш, янги ишлаб чиқаришларни ташкил этиш борасида ҳам сўз борди. 

Тадбирда Ўзбекистон Савдо-саноат палатаси раиси А.Икрамов, “Ҳар биримиз истеъмолчи бўлиб, сифатли ва арзон маҳсулотларни сотиб олиш ниятимиз бор ва бунга доимо интиламиз. Лекин биз Ўзбекистонда халқимизнинг минг йиллик тадбиркорлик фазилатлари асосида нафақат истеъмолчи қолаверса салоҳиятли, бой ишлаб чиқарувчи мамлакатга айланишимиз ва бундан ғурурланишимиз даркор” - дея таъкидлаб ўтди.

Жорий йилнинг 27 июнь куни Президентимизнинг “Солиқ ва божхона имтиёзлари берилишини янада тартибга солиш чора-тадбирлари тўғрисида”ги ПФ-5755-сонли фармони қабул қилинди.

Фармонга кўра, 2019 йил 1 августдан бошлаб:

• ягона ер солиғи тўловчиси ҳисобланган қишлоқ хўжалиги товарларини ишлаб чиқарувчилар ихтиёрий равишда қўшилган қиймат солиғини тўлашга ўтишлари мумкин;
• календарь йили давомида хизматларни реализация қилишдан олган тушуми 100 миллион сўмдан ошган, бироқ бир миллиард сўмдан кўп бўлмаган телекоммуникациялар операторлари ва (ёки) провайдерларига воситачилик хизматларини кўрсатувчи якка тартибдаги тадбиркорлар кўрсатилган хизматлар учун ҳақ суммасидан 25 фоиз ставкада ягона солиқ тўловини тўлашга ўтиши белгиланди.

Шу билан бирга, 2019 йил 1 октябрдан бошлаб:

- бензин, дизель ёқилғиси ва газни ёқилғи қуйиш станциялари орқали охирги истеъмолчиларига сотадиган юридик шахслар, ушбу товарларни сотишдан тушумнинг миқдоридан қатъи назар, қўшилган қиймат солиғи тўловчилари ҳисобланади;

- товарларни импорт қилувчи тадбиркорлик субъектлари, товарлар (ишлар, хизматлар) реализацияси тушуми миқдоридан қатъи назар, қўшилган қиймат солиғи тўловчилари ҳисобланадилар. Бунда товарларни биринчи марта импорт қилувчи тадбиркорлик субъектлари импорт шартномаси тузилган ойдан кейинги ойнинг 1 санасидан бошлаб қўшилган қиймат солиғи тўловчиси сифатида ҳисобга туриши шарт;

- қуйидагилар бўйича қўшилган қиймат солиғидан, шу жумладан, импорт қилинганда ҳам имтиёзлар бекор қилинади:

• асбест, кўмир, ёғоч материаллари, ёғоч ва ундан тайёрланган буюмлар, углеводород хомашёси;
• соя данаги, кунгабоқар ва кунжут уруғлари, мойли хомашё ва шакар хомашёси;
• қишлоқ хўжалиги техникаси, автотранспорт воситалари, автотранспорт воситаларини ишлаб чиқаришда фойдаланиладиган бутловчи буюмлар, материаллар ва технологик асбоб-ускуналар;

- юридик шахсларнинг тижорат банкларига жойлаштирган маблағларидан фоиз кўринишида олинган тўлов манбаини фойда солиғидан озод қилиш бўйича имтиёзлар бекор қилинади.

Фармонда қайд этилишича, қўшилган қиймат солиғининг тўлақонли занжирини яратиш ва барча хўжалик юритувчи субъектлар учун тенг шароитларни таъминлаш мақсадида:

• 2019 йил 1 октябрдан бошлаб ўзи ишлаб чиқарган қишлоқ хўжалиги маҳсулотларига ва Ўзбекистон Республикасида ишлаб чиқарилган озиқ-овқат маҳсулотларига нисбатан белгиланган қўшилган қиймат солиғи бўйича имтиёзлар бекор қилинади;
• 2019 йил январь ойидан сентябрь ойигача 1 миллиард сўмдан ортиқ пул айланмаси (тушуми)га эга бўлган ёки 50 гектардан ортиқ қишлоқ хўжалигига мўлжалланган ер майдонларига эга бўлган ягона ер солиғи тўловчилари қўшилган қиймат солиғи тўловчилари ҳисобланадилар ва белгиланган тартибда қўшилган қиймат солиғи тўловчиси сифатида рўйхатдан ўтишлари шарт. Бунда 2019 йил 1 октябрдан бошлаб белгиланган пул айланмаси (тушуми) чегаравий даражасига етган ягона ер солиғи тўловчилар ушбу даражага эришилган ойдан кейинги ойнинг 1 санасидан бошлаб қўшилган қиймат солиғини тўлашга ўтади;
• пахта хомашёсини ишлаб чиқарувчилар 2019 йил ҳосилидан бошлаб қўшилган қиймат солиғини тўлашга ўтадилар. Бунда уларга 2018 йилнинг 1 октябридан илгари бўлмаган вақтда ҳақиқатда олинган ва пахта хомашёсини етиштириш учун ишлатилган товарлар (иш, хизматлар) учун тўланган қўшилган қиймат солиғи суммасини ҳисобга олиш ҳуқуқи тақдим этилади.

Ўзбекистонда ишлаб чиқарилган озиқ-овқат маҳсулотлари қисми бўйича қўшилган қиймат солиғидан имтиёзга эга бўлган юридик шахсларга имтиёздан воз кечиш тўғрисида хабарнома бериш асосида ушбу хабарнома берилган ойдан кейинги ойнинг 1 санасидан бошлаб қўшилган қиймат солиғини тўлаш ҳуқуқи берилади.

Шунингдек, мазкур фармон асосида имтиёзлар билан боғлиқ бошқа ўзгаришлар ҳам кучга кириши белгиланган. Фармоннинг тўлиқ матни билан ушбу ҳавола http://www.uza.uz/oz/documents/soli-va-bozhkhona-imtiyezlari-berilishini-yanada-tartibga-so-28-06-2019 орқали танишишингиз мумкин.