ЎЗБЕКИСТОНДА МОЛИЯВИЙ ҲИСОБОТНИНГ ХАЛҚАРО СТАНДАРТЛАРИГА ЎТИШ ЖАДАЛЛАШАДИ

Қабул қилинган ҳужжат тадбиркорлик субъектларини МҲХСга ўтишга тайёрлаш ва мувофиқлаштириш жараёнини тубдан қайта кўриб чиқишни назарда тутади. Хусусан: 

1. 2021 йил якунларидан бошлаб мажбурий равишда МҲХС асосида молиявий ҳисоботни тайёрлайдиган шахслар рўйхати белгиланди. Унга акциядорлик жамиятлари, тижорат банклари, суғурта ташкилотлари ва йирик солиқ тўловчилар тоифасига киритилган юридик шахслар киритилган. Улар:

• 2021 йил 1 январдан бошлаб МҲХС асосида бухгалтерия ҳисобининг юритилишини ташкил этишлари;
• халқаро стандартларни сифатли қўллаш учун етарли бўлган бухгалтерия хизмати ходимлари билан таъминлашлари лозим бўлади.

Давлат активларини бошқариш агентлиги давлат улушига эга хўжалик жамиятлари ва давлат корхоналарининг МҲХС асосида бухгалтерия ҳисобини юритиш ва молиявий ҳисоботни тайёрлашга ўтиш жадвалини ҳар йили тасдиқлайди ва 1 июнга қадар эълон қилади.

2. Молия вазирлиги МҲХСни жорий этиш бўйича ваколатли орган этиб белгиланган. Тегишли вазифаларни бажариш учун вазирлик тузилмасида Молиявий ҳисоботнинг халқаро стандартларини жорий этишни мувофиқлаштириш ва эълон қилинадиган молиявий ҳисобот сифатининг ташқи назорати бўлими ташкил этилади.

Етарли билим ва кўникмаларга эга бўлган кўплаб малакали мутахассислар тайёрлаш заруратини эътиборга олган ҳолда, ҳужжатда миллий кадрларни тайёрлашга нисбатан умуман янги комплекс ёндашув назарда тутилмоқда.

2020-2025 йиллар давомида биринчи марта МҲХС бўйича ўқитиш, малакани ошириш, шунингдек, бухгалтерларни халқаро сертификатлаш доирасида (АССА дастурлари бўйича) имтиҳон топшириш учун рўйхатдан ўтказиш харажатлари республика бюджетидан қопланади. Ушбу харажатларни олий таълим муассасаларининг “Бухгалтерия ҳисоби” ва “Аудит” фанлари ўқитувчилари, давлат органлари ходимлари, олий таълим муассасаларининг талабалари ва битирувчилари (тугатгандан сўнг 6 ой давомида) қоплатиб олишлари мумкин.

Халқаро бухгалтер сертификатига эга бўлган талабгорлар олий таълим муассасалари магистратурасининг “Бухгалтерия ҳисоби” ва “Аудит” мутахассисликларига кириш имтиҳонларини топширмасдан тўлов-контракт асосида кириш ҳуқуқига эга.

Мазкур тадбирлар нафақат МҲХС соҳасида етарли бўлган малакали амалиётчи мутахассисларни ўз вақтида тайёрлаш, балки кадрлар тайёрлашнинг миллий тизимини барпо этишни таъминлаш имконини ҳам бериши кутилмоқда.

Бундан ташқари, Президент қарори билан Молия вазирлигига қуйидаги топшириқлар берилди:

• мустақил халқаро ташкилот ҳисобланган Молиявий ҳисоботнинг халқаро стандартлари фонди билан битим тузиш ҳамда МҲХС ва унга тушунтиришлар матнини давлат тилига таржима қилиш бўйича тадбирлар харажатларини қоплаш;
• Олий ва ўрта махсус таълим вазирлиги билан биргаликда халқаро ташкилотларнинг бухгалтерия ҳисоби ва аудит соҳасидаги мутахассисларни тайёрлашнинг халқаро амалиётини ўрганиш натижалари бўйича “Бухгалтерия ҳисоби ва аудит” бакалавриат таълим йўналишининг кундузги ўқув шакли муддатини қисқартириш имконияти тўғрисида таклиф киритиш.

Молия вазирлиги томонидан ташкил этиладиган семинар ва мавзуга оид учрашувлар доирасида кўрилаётган чора-тадбирлар тўғрисида батафсил ахборот олиш мумкин.

МҲХСга ўтиш қандай амалга оширилиши тўғрисида сиз эълон қилишга тайёрланаётган молия вазирининг ўринбосари Дилшод Султонов билан интервьюда батафсил билиб олишингиз мумкин.

Ҳужжат Қонун ҳужжатлари маълумотлари миллий базасида эълон қилинган ва 25.02.2020 йилдан кучга кирди.

 

Манбаа: norma.uz