Маҳсулотларни экспорт қилишда давлат томонидан тақдим этилаётган навбатдаги имтиёзлар ва имкониятлар

Жорий йилнинг 7 май куни Ўзбекистон Президентининг
«Экспорт фаолиятини янада қўллаб-қувватлаш чора-тадбирлари тўғрисида"ги ПҚ-4707-сонли қарори қабул қилинди.

Мазкур қарорга биноан,  Ўзбекистон Республикаси Президентининг 2019 йил 24 майдаги ПҚ-4337-сонли «Экспорт фаолиятини молиялаштириш ва суғурта ҳимояси механизмларини кенгайтириш чора-тадбирлари тўғрисида»ги қарорига мувофиқ жорий этилган маҳсулотларни экспорт қилишда ташиш харажатларини 50 фоизигача миқдорда компенсация қилишга субсидиялар тақдим этиш, маҳсулотларни автомобиль ва ҳаво транспорт воситаларида ташиш орқали экспорт қилишга ҳам татбиқ этилади.

Шунингдек,  экспорт қилишда автомобиль, темир йўл ва ҳаво транспортида ташиш харажатларининг бир қисми компенсация қилинадиган  қишлоқ хўжалиги, текстиль, қўрилиш, маиший техника ва  бошқа саноат маҳсулотларини ўз ичига олган 68 хил турдаги товарлар рўйхати тасдиқланди.

          Ушбу рўйхатга кўра тухум, парранда гўшти, таркибида антибиотиклар бўлган пенициллинлар, дори воситалари, гулқоғозлар ва шунга ўхшаш девор қопламалари, газлама, тўқима гиламлар, линолеум, тикув-трикотаж маҳсулотлари, пойабзал, керамикадан ясалган пардозлаш буюмлари, ошхона идишлари, аккумуляторлар, трансформаторлар, чанг ютгичлар, ўтириш учун мебель, гигиена воситалари  ва бошқа  масулотларни  автомобиль, темир йўл ва ҳаво транспортида ташиш орқали экспорт қилишда транспорт харажатларининг бир қисми компенсация қилинади.

Шу билан бирга, экспорт қилувчилар гаров сифатида суғурта хизматларидан фойдаланганда суғурта мукофотини қоплашга Ўзбекистон Республикаси Инвестициялар ва ташқи савдо вазирлиги ҳузуридаги Экспортни рағбатлантириш агентлиги томонидан компенсациялар тақдим этилиши белгиланди.

Қарорга мувофик, Ўзбекистон божхона чегарасидан экспорт операциялари бўйича олиб ўтилаётган товарларнинг божхона расмийлаштирувини амалга оширишда жисмоний ва юридик шахсларга нисбатан жорий қилинган барча турдаги мажбурий тўловлар ва ижро ҳужжатлари бўйича қарздорлиги мавжудлигини текшириш амалиёти 2021 йил 1 январга қадар бекор қилинади.

ССП Ахборот-хизмати