Ўзбек-Туркман ишбилармонлар кенгашининг йиғилиши

2020 йил 7 октябр куни Ўзбекистон ва Туркманистон Савдо-саноат палаталари томонидан Ўзбекистон-Туркманистон ишбилармонлар кенгашининг видеоконфереция шаклидаги йиғилиши бўлиб ўтди.

Тадбирда ишбилармонлар кенгашининг миллий бўлимлари раиси сифатида Ўзбекистон Республикаси Савдо-саноат палатаси раиси Адҳам Икрамов, шунингдек, Туркманистон Савдо-саноат палатаси раиси Довлетгелди Режепов қатнашди.

Шунингдек, тадбирда Ўзбекистондан Ўзбекистон Республикасининг Туркманистондаги Фавқулотда ва Мухтор Элчиси А.Қўчқоров, Ўзбекистон экспортчилар уюшмаси раиси М.Умаров, Ўзбекистон Республикаси Инвестициялар ва ташқи савдо вазирлиги бошқарма бошлиғи Н.Хошимов, Ташқи ишлар вазирлиги бўлим бошлиғи А. Хаджаева, шунингдек, бир қатор  вазирлик ва идоралар, ҳамда тадбиркорлар иштирок этишди.

Туркманистондан, Туркманистоннинг Ўзбекистон Республикасидаги Фавқулодда ва Мухтор Элчиси Я.Мамедов, Туркманистон Қишлоқ хўжалиги ва атроф-муҳитни муҳофаза қилиш вазирлигининг аграр ислоҳотлар ва жаҳон тажрибаси бошқармаси бошлиғи Г.Гусейнов, “Тенекар” фармацевтика корхоналари директори, Соғлиқни сақлаш вазирлигининг “Туркменсенагат” уюшмаси ва Туркманистон тиббиёт саноати раҳбари С. Акгаев ва бошқа масъул вазирлик ва идораларнинг вакиллари, шунингдек тадбиркорлик субъектлари иштирок этишди.

Таъкидлаш жоизки, ушбу ишбилармонлар кенгаши 2018 йил апрел ойида Тошкентда ташкил этилган бўлиб, Ўзбекистон ва Туркманистон ишбилармон доиралари ўртасида савдо-инвестиция, транспорт-логистика соҳаларида, шунингдек иқтисодиётнинг турли соҳаларида ҳамкорликни чуқурлаштиришга қаратилган.

Шуни алоҳида таъкидлаб ўтиш жоизки, ушбу Ишбилармонлар кенгаши иқтисодий мулоқотни фаоллаштиришга хизмат қилиб, икки мамлакат ишбилармон доиралари ўртасида қулай шароитлар яратишга асос яратади. Ўзбекистон-Туркманистон ишбилармонлар кенгаши турли соҳалардаги потенциал инвестиция лойиҳаларини муҳокама қилиш ва амалга ошириш учун платформа бўлиб, икки мамлакат ўртасидаги савдо алоқаларини ривожлантиришга ҳисса қўшади.

Иштирокчиларнинг таъкидлашларича,  сўнгги 2 йил ичида икки томонлама ҳамкорлик жараёнида Ашхабодда бўлиб ўтган "Made in Uzbekistan” Миллий кўргазмасида 70 га яқин ўзбекистонлик компаниялар вакиллари қатнашган, шу билан бирга Туркманистон товар ишлаб чиқарувчиларининг кўргазмаси, шунингдек Тошкентда қўшма ўзбек-туркман бизнес форуми ташкил этилган.

Кун тартибида саноат ва транспорт, тўқимачилик саноати, соғлиқни сақлаш ва фармацевтика, шунингдек, Туркманистон ва Ўзбекистон ўртасидаги қишлоқ хўжалиги соҳасидаги ҳамкорлик масалалари кўриб чиқилди. Шунингдек, коронавирус пандемияси сабаб бўлган глобал иқтисодиётдаги оғир даврда ҳамкорлар топишга  кўмаклашиш ва икки мамлакат бизнес вакиллари ўртасида “B2B” форматидаги музокараларни таъминлаш орқали ҳамкорлик алоқаларини йўлга қўйиш масалалари муҳокама қилинди.

Учрашув давомида,  Ўзбекистон иқтисодиётининг асосий истиқболли тармоқлари тақдимоти намойиш этилди. Шунингдек, Туркманистон қатнашчилари Ўзбекистонда амалга оширилаётган иқтисодий ислоҳотларнинг натижалари, Республикада инвестициялар киритиш ва бизнес юритиш учун яратилган қулай шароитлар билан таништириб ўтилди.

Таъкидлаш жоизки, Ўзбекистонда туркман капитали иштирокидаги 148 корхона, 66 қўшма корхона ва 100 фоиз туркман капитали иштирокидаги 88 корхона фаолият кўрсатмоқда.

Ўз навбатида, Туркманистон томони сўнгги уч йил давомида Ўзбекистоннинг ижтимоий-иқтисодий ривожланиш суръатлари ва мамлакатнинг хорижий мамлакатлар билан савдо-иқтисодий алоқаларини кенгайтиришдаги фаолиятини юқори баҳолади.

Икки мамлакат ишбилармон доираларининг 30 дан ортиқ вакиллари иштирок этиши ушбу тадбирнинг ўзига хос хусусиятидир. Ишбилармонлар кенгаши айнан икки мамлакат тадбиркорлари ўртасидаги ҳамкорликни ривожлантиришга кўмаклашадиган, шериклик алоқаларини ўрнатиш ва янги алоқаларни топиш учун шароит яратадиган, шунингдек, Ўзбекистон ва Туркманистон ишбилармонлари ўртасида бизнес алоқалари соҳасида юзага келадиган аниқ муаммоларни ҳал қиладиган платформага айланди.

ССП ахборот хизмати