Қорақалпоғистон Республикасида янги тадбиркорлик субъектларини ташкил этиш бўйича “Йўл харитаси” ишлаб чиқилмоқда

Ўзбекистон Республикаси Президентининг жорий йил 2 октябрь куни Қорақалпоғистон Республикасига ташрифи ҳамда Жўқорғи Кенгесининг навбатдан ташқари сессиясида тадбиркорликни жадал ривожлантириш бўйича қатор топшириқлар берилган.

Хусусан, Қорақалпоғистон Республикасида тадбиркорликни ривожлантиришда ҳар бир туман (шаҳар)нинг иккитадан “ўсиш нуқта”си бўйича соҳа тадбиркорларига 3 йил муддатга ер солиғи, мол-мулк солиғи, кичик тадбиркорларнинг айланмасидан олинадиган солиқ ва якка тартибдаги тадбиркорлар қатъий белгиланган солиқдан озод этилиши белгилаб берилган.

Шу билан бирга, Савдо-саноат палатаси, Давлат солиқ қўмитаси ва Қорақалпоғистон Республикаси Вазирлар Кенгашига 2021 йилда ҳар бир туман ва шаҳар кесимида 11 мингдан ортиқ янги тадбиркорлик субъектларини ташкил этиш чораларини кўриш бўйича вазифа юклатилган.

Шундан келиб чиқиб, Қорақалпоғистон Республикасининг туман (шаҳар)ларидаги мавжуд имкониятлар, ишга солинмаган резервлар ва “ўсиш нуқталари” бўйича соҳа тадбиркорларига берилган алоҳида солиқ имтиёзлари асосида аҳолини тадбиркорликка фаол жалб этиш орқали янги тадбиркорлик субъектларини ташкил этиш бўйича “Йўл харитаси” ишлаб чиқилмоқда.

ССП Ахборот-хизмати