Қишлоқ хўжалигида илғор технологияларни татбиқ қилиш бўйича тажрибамиз билан ўртоқлашамиз

БМТ Тараққиёт дастурининг Ўзбекистондаги доимий вакили Матилда Димовска хоним ўтган ҳафта Фарғона водийсига бўлиб ўтган 3 кунлик расмий ташрифи доирасида Савдо саноат палатаси ва БМТТД ҳамкорлигида ҳамда Россия Федерациясининг молиявий кўмаги остида амалга оширилаётган “Фарғона водийсида фермерларни иқлим ўзгариши хатарларига мослашувчанлигини ва барқарорлигини ошириш” лойиҳаси доирасида ўрнатилган агрометеорологик станциялардан бирига ташриф буюрди.

Фарғона вилояти Қува туманидаги “Томорқа ер участкаларини ривожлантириш илмий-амалий маркази”га ташрифи давомида Димовска хоним марказ ходимлари ҳамда вилоят ва туманнинг ўсимликлар карантини инспекциялари вакиллари, фермерлари билан учрашди. Учрашув мобайнида улар илғор технологияларни татбиқ этиш туфайли ишларнинг самарадорлигининг ўсиши, хусусан, мева-сабзавотларни етиштиришда агрометеостанцияни қўлланилиши тўғрисида гаплашдилар. Бугунги кунда ушбу марказ ҳудудида ўрнатилган агрометеорологик станция маълумотларидан  мунтазам равишда 40 га яқин фермерлар ўз фаолиятларида фойдаланмоқдалар. Ўсимликлар карантини инспекцияси мутахассислари ёрдамида фермерлар нафақат об-ҳаво ва мазкур худуддаги зараркунандалар ва касалликларнинг тарқалиш хавфи ҳақидаги маълумотларни, балки уларни олдини олиш ва қарши курашишда ўз вақтида малакали ёрдам оладилар. Метеорологик стантсияни ўрнатиш ва ишга туширишдан олдин, лойиҳа томонидан карантин инспекциясининг мутахассислари, фермерлар ва томорқа ер участкалари эгалари учун бир қатор тренинглар ўтказилган бўлиб, унда иштирокчилар агрометеорологик станциянинг вазифаси ва хусусиятлари, прогнозлаш ва профилактика чораларининг роллари тўғрисида батафсил маълумотларга эга бўлганлар.

Агрометеорологик станцияни мазкур марказга ўрнатилиши бежиз бўлмаган, чунки бу ерда қишлоқ хўжалиги экинларини йил давомида етиштириш учун барча шароитлар бўлиб, бу ерда субтропик ва маҳаллий дарахтларни ўз ичига олган 70 дан ортиқ мевали дарахтлар мавжуд. Олинган ҳосил Россия, Туркия, Украина ва бошқа мамлакатларга экспорт қилинади. Бундан ташқари  бу ерда ноёб декоратив дарахтлар ҳам ўстирилади. Марказда йилига 1,0 миллион донага яқин турли хил мевали ва манзарали дарахтлар этиштирилади.

Умуман олганда, Димовска хоним амалга оширилган ишларни ижобий баҳолади, шунингдек келажакда ҳамкорлик шунақа юқори даражада сақланиб қолишинишига ва янада юксак натижаларини беришига умид билдирди

ССП Ахборот-хизмати