Савдо-саноат палатаси томонидан Қарши шаҳрида ўқув семинарлари бошланди.

Жорий йилнинг 13 октябрь куни Ўзбекистон Республикаси Президентининг “Аҳолини тадбиркорликка жалб қилиш тизимини такомиллаштириш ва тадбиркорликни ривожлантиришга доир қўшимча чора-тадбирлар тўғрисида”ги ПҚ-4862-сонли қарори қабул қилинган эди.

Мазкур қарорга кўра аҳолининг тадбиркорлик билан шуғулланишга қизиқиши ва манфаатдорлигини ошириш, аҳолида тадбиркорлик соҳасида зарурий кўникмаларни шакллантиришга қаратилган ўқитиш тизимини жорий этиш, мазкур жараёнга халқаро ташкилотлар, нодавлат нотижорат ташкилотлари ва нодавлат таълим ташкилотларини кенг жалб қилиш каби масалалар назарда тутилган.

Шунингдек, тадбиркорлик кўникмаси ва тажрибасига эга бўлган аҳолини ва бошқа кичик бизнес вакиллари салоҳиятини рўёбга чиқариш орқали улар фаолиятини кенгайтириш ва ривожлантиришга қаратилган тўлақонли тизимни яратиш, аҳолининг тадбиркорликка қизиқиши, турмуш даражасини яхшилашга интилиши ва манфаатдорлик ҳиссини кучайтиришга қаратилган мотивацион чора-тадбирларни амалга ошириш белгиланган.

Аҳолига ўзининг турмушини яхшилаш, касб-ҳунар ва бизнес билан шуғулланиш орқали даромад топиш ҳамда уларга бундай фаолиятни йўлга қўйишнинг амалий жиҳатларини ўргатишга қаратилган «коучинг» видео материаллар ва дарсликлар, мотивацион роликлар тайёрлаш жараёнида нодавлат нотижорат ташкилотларининг фаол иштирокини муҳим ҳисобланади.

Шу мақсадда жорий йилнинг 19 ноябрь куни Ўзбекистон Савдо-саноат палатаси томонидан Қарши шаҳрида “Ёшлар дафтари” ва “Аёллар дафтари”га киритилган ва тадбиркорлик ташаббусларига эга бўлган аҳоли вакиллари учун қисқа муддатли ўқув семинарлари бошланди.

Ўзбекистон Савдо-саноат палатасининг янги, замонавий, инновацион тарзда жиҳозланган биносида аҳолини тадбиркорлик асосларига ўқитиш, уларда бизнес кўникмаларни шакллантириш мақсадида махсус ўқув хонаси ташкил қилинган.

Ушбу бино эндиликда нафақат вилоят тадбиркорларининг уйи, балки ўз бизнесини бошлаш истагидаги ёшлар учун таълим муассасаси ҳамдир.

Қашқадарё вилоятида ҳам тадбиркорлик асослари бўйича нодавлат таълим муассасаси ташкил қилинган “Exclusive education and business” ўқув маркази бугундан бошлаб, янги тизимда, доимий ва узлуксиз ўқув-семинарлар ҳамда тренинглар ташкил қилиб боради.

Қарорга кўра ташкил этиладиган ўқув курсларини муваффақиятли тамомлаб, сертификатини олган шахсларга ўз бизнесини ташкил этиш учун 33 миллион сўмгача бўлган миқдордаги микрокредитлар таъминотсиз ажратилади.

Шунингдек, микрофирма ва кичик корхона таъсис этган шахсларга учинчи шахс кафиллиги, суғурта полислари, кредит ҳисобига сотиб олинаётган мол-мулклар гарови, тадбиркорлик фаолиятини қўллаб-қувватлаш давлат жамғармасининг кафиллиги ва қонун ҳужжатларида назарда тутилган бошқа таъминот турлари асосида 225 миллион сўмгача миқдорда микрокредитлар ажратилади.

ССП Ахборот-хизмати