Ўзбекистон Республикаси Олий Мажлиси Қонунчилик палатасида “Стандарталаштириш соҳасидаги миллий қонунчиликни Евроосиё иқтисодий иттифоқи нормалари билан уйғунлаштириш бўйича олиб борилаётган ишлар” мавзусида йиғилиш бўлиб ўтди.

Ўзбекистон Республикаси Олий Мажлиси Қонунчилик палатаси томонидан 2021 йил 12 март куни “Стандарталаштириш, техник жиҳатдан тартибга солиш соҳасидаги миллий қонунчиликни Евроосиё иқтисодий иттифоқи (ЕОИИ) нормалари билан уйғунлаштириш бўйича олиб борилаётган ишлар” мавзусида йиғилиш ўтказилди.

Йиғилишдан кўзланган асосий мақсад Евроосиё иқтисодий иттифоқи доирасида стандартлаштириш ва техник жиҳатдан тартибга солиш соҳасидаги мажбурий меъёрлар ва талаблар билан Ўзбекистондаги стандартлаштириш ва техник жиҳатдан тартибга солиш соҳасидаги қонунчиликни уйғунлаштириш масалаларини кўриб чиқиш, бу борада ЕОИИ техник жиҳатдан тартибга солиш соҳасидаги талабларнинг миллий сертификация ва стандартлаштириш тизимига мослигини баҳолаш ҳамда ЕОИИга аъзо давлатлар билан савдо алоқаларида сертификациялашга оид мавжуд муаммолар атрофлича муҳокама этилди.

Тадбирда Ўзбекистон Республикаси Олий Мажлиси Қонунчилик палатаси Саноат, қурилиш ва савдо масалалари қўмитасининг депутатлари, Ўзбекистон Республикаси Иқтисодий тараққиёт ва камбағалликни қисқартириш вазирлиги, Инвестициялар ва ташқи савдо вазирлиги, Давлат божхона қўмитаси, “Ўзстандарт” Агентлиги масъул ходимлари ҳамда Ўзбекистон Савдо-саноат палатаси масъул ходими Ғ.Усмонов иштирок этдилар.

Тадбирда Савдо-саноат палатаси томонидан ЕОИИда қабул қилинган стандартлаштириш ва техник жиҳатдан тартибга солиш соҳасидаги қонунчиликнинг Ўзбекистоннинг саноат тармоқларига ижобий ва салбий таъсири, уларни миллий стандартлаштириш ва техник жиҳатдан тартибга солиш қонунчилигини уйғунлаштиришда республикамиз саноат тармоқларининг рақобатқодирлигини мустаҳкамлашдаги аҳамияти ҳамда миллий маҳсулотларимизни ЕОИИга аъзо давлатлар бозорларига кириб боришлари учун қандай имконият ва хавф-хатарларга дуч келиш эҳтимоллари ҳақида фикр-мулоҳазалар билдирилди.

Тадбир якунига кўра Ўзбекистон Республикаси Олий Мажлиси Қонунчилик палатаси ва тегишли вазирлик, идоралар ҳамда Савдо-саноат палатаси ўртасида ЕОИИда қабул қилинган стандартлаштириш ва техник жиҳатдан тартибга солиш соҳасидаги қонунчилик талаблари ва бу борадаги амалга оширилиши лозим бўлган вазифалар ҳусусида республикамиз саноат тармоқлари, хўажлик бирлашмалари ва тадбиркорлик субъектларини хабардор қилиш, бу борада тушунтириш ва тарғибот ишларини олиб бориш бўйича ҳамкорлик қилишга келишиб олинди.

ССП Матбуот хизмати