Вилоят секторларининг раҳбарлари томонидан тадбиркорлар билан учрашув ўтказилди

Ўзбекистон Республикаси Президенти раҳбарлигида 2021 йил 8 апрель куни ўтказилган видеоселектор йиғилишида берилган топшириқлар ижросини таъминлаш мақсадида Навоий шаҳридаги «Ёшлар маркази»да вилоят секторлар раҳбарлари тадбиркорлар билан учрашди. Мазкур учрашувда масъул ташкилотлар билан бир қаторда Савдо-саноат палатаси вилоят ҳудудий бошқармаси бошлиғи ҳам иштирок этди.

Навоий вилояти ҳокими Қобул Турсунов, вилоят прокурори Бахтиёр Аҳмедов, вилоят ИИБ бошлиғи Азат Тасбаев ва вилоят ДСБ раҳбари Анвар Ботиралиевлар қарийб 5 соат давомида шаҳар ва туманлардан келган тадбиркорларнинг муаммоларини ҳал қилиш чораларини кўришди.

Очиқ мулоқотда 150 нафарга яқин тадбиркор иштирок этиб, уларни қийнаб келаётган муаммолар ва фаолиятига оид таклифларини билдирди. Мурожаатларнинг аксарияти имтиёзли маблағ ва ер ажратиш, электр энергияси ҳамда табиий газ масалаларида бўлди.

Мулоқот якунида вилоят ҳокими Қ.Турсунов тадбиркорларни янада қўллаб-қувватлаш, улранинг муаммоларини жойига бориб ўрганиш ва тезкор ҳолатда аниқланган муаммоларни ҳал этиш чоралари кўрилиши бўйича барча мутасадди ташкилот раҳбарларига топшириқ берди.

ССП Ахборот-хизмати