“Чегараолди ҳудудлар интеграциялашуви – ривожланиш гарови” мавзусидаги Фарғона-Баткен-Сўғд халқаро бизнес-форуми бўлиб ўтди

Жорий йилнинг 22 апрель куни Фарғона шаҳридаги Ислом Каримов номидаги вилоят театр-концерт саройида Фарғона вилояти, Қирғизистоннинг Баткен вилояти ҳамда Тожикистоннинг Сўғд вилояти раҳбарлари ҳамда ишбилармон доиралари вакиллари иштирокида “Чегараолди ҳудудлар интеграциялашуви – ривожланиш гарови” мавзусидаги халқаро бизнес-форум бўлиб ўтди.

Форум аввалида меҳмонлар шу ерда ташкил этилган вилоятда ишлаб чиқарилган маҳсулотлар кўргазмаси билан танишдилар. Кўргазмадан ўрин олган текстиль, озиқ-овқат, қишлоқ хўжалиги, чарм-галантерея, қурилиши маҳсулотлари, тиббиёт жиҳозлари Қирғизистон ва Тожикистон вакилларида катта қизиқиш уйғотди.

Бизнес-форумни кириш сўзи билан очган вилоят ҳокими Хайрулло Бозоров, биринчи бор уч чегарадош вилоят вакиллари иштирокида ташкил этилаётган бундай йирик иқтисодий анжуман анъанавий тус олишига ҳамда келгусида барча соҳаларда ҳудудлараро ҳамкорликни ривожлантириш масалалари муҳокама қилинадиган нуфузли платформага айланишига ишонч билдирди. Вилоят раҳбари, Баткен ва Сўғд вилоятлари билан ўзаро товар айланмасини ошириш мақсадида савдо ярмаркалари ташкил этиш, саноат кооперацияси, қишлоқ хўжалиги, текстиль, қурилиш материаллари ишлаб чиқариш каби соҳаларда қўшма лойиҳаларни ишлаб чиқиш, ўзаро инвестиция лойиҳаларини амалга ошириш режалаштирилаётганини маълум қилди.

“Чегараолди ҳудудлар интеграциялашуви – ривожланиш гарови” мавзусидаги халқаро бизнес-форум якунида Хайрулло Бозоров ва Ражаббой Аҳмадзода Фарғона вилояти ва Сўғд вилояти ўртасида савдо-иқтисодий ҳамкорликни ривожлантиришга қаратилган “Йўл харитаси”ни имзоладилар. 

Шунингдек, Фарғона тумани ҳамда Баткен вилоятининг Қадамжой тумани ўртасида ҳам ҳамкорлик меморандумлари имзоланди.

Форум доирасида ўтказилган B2B ҳамда G2B учрашувлар натижасида қатор янги ҳамкорлик лойиҳаларининг тамали қўйилди.

Хусусан, ушбу тадбирнинг давоми сифатида, Қўқон шаҳридаги “Ўрда” тантаналар саройида Фарғона ва Тожикистоннинг Сўғд вилоятлари Савдо-саноат палаталари ўртасида англашув меморандуми имзоланди.

Ўзбекистон Савдо-саноат палатаси Фарғона вилояти ҳудудий бошқармаси бошлиғи Алишер Солиев ҳамда Сўғд вилояти Савдо-саноат палатаси бош директори Мухаммаджон Мухамеджанов томонидан имзоланган меморандум, икки вилоят ишбилармон доираларининг ўзаро алоқаларини мустаҳкамлаш, икки вилоят иқтисодий салоҳиятини ўзаро танитиш мақсадида ҳамкорликда тадбиркорлар учун қўшма кўргазмалар, конференциялар, семинарлар ташкил этиш, қўшма корхоналар ташкил этишга ва ўзаро манфаатли савдо битимларини тузишга кўмаклашиш каби масалаларни ўз ичига олади. Ушбу меморандум Фарғона ва Сўғд вилоятлари Савдо-саноат палаталари ҳамкорлигида икки вилоят ишбилармонларини бирлаштиришга хизмат қилади.

ССП Матбуот хизмати