Тадбиркорларнинг ҳуқуқий ҳимояси кучайтирилмоқда

Мамлакатимизда бизнес муҳитини яхшилаш, инвестициявий жозибадорликни ошириш, тадбиркорларга кенг имкониятлар яратиш мақсадида Ўзбекистон Республикаси Президентининг 2021 йил 21 апрелдаги “Тадбиркорликни қўллаб-қувватлаш тизимини такомиллаштириш, ишбилармонлик муҳитини янада яхшилаш бўйича қўшимча чора-тадбирлар тўғрисида”ги  ПҚ-5087-сон Қарори имзоланди.

Мазкур Қарорга кўра, 2021 йил 1 майдан бошлаб тадбиркорлик субъектларини давлат томонидан қўллаб-қувватлашнинг қуйидаги қўшимча чоралари жорий этилади:

• Тадбиркорлик фаолиятиини қўллаб-қувватлаш давлат жамғармаси томонидан кичик тадбиркорлик субъектларига Марказий банк асосий ставкасининг 1,75 бараваридан ошмаган миқдоридаги фоиз ставкаси билан фоиз харажатларини қоплаш учун компенсация тақдим этилади;
• “Ижтимоий ҳимоя ягона реестри” ахборот тизимида рўйҳатга олинган фуқароларга тадбиркорлик ташаббусларини амалга ошириш учун кредит миқдорининг 75 фоизигача, бироқ базавий ҳисоблаш миқдорининг 150 бараваридан ортиқ бўлмаган тижорат банклари кредитлари бўйича кафиллик берилади;
• тадбиркорлик субъектларига банк кредитлари бўйича компенсация ва кафилликлар кредит шартномалари сонидан қатьи назар берилади. Бунда, кредитнинг умумий суммаси 10 млрд сўмдан, кафилликларнинг умумий суммаси 8 млрд сўмдан, бироқ умумий кредит суммасининг 50 фоизидан ошмаслиги лозим;
• экспорт қилувчилар томонидан товарлар бўйича тўловларни кечиктириб тўлаш шарти билан экспорт қилинганда, уларнинг айланма маблағларини тўлдириш учун револьвер кредитларни молиялаштиришга тижорат банкларига молиявий ресурслар тақдим этилади. Бунда ушбу ресурслар ҳисобидан кредитлар тўловлар кечиктирилган муддатга ва экспорт қилинаётган маҳсулотлар қиймати миқдорида, бироқ 3 миллион АҚШ доллари эквивалентидан кўп бўлмаган миқдорда, йиллик 4 фоизли ставка билан ажратилади.

Энди ушбу қарор билан, якка тартибдаги тадбиркорлар ҳам Тадбиркорлик фаолиятини қўллаб-қувватлаш давлат жамғармасинингкафиллик ва компенсациялардан фойдаланиш ҳуқуқига эга бўлишади.

Халқ депутатлари туман (шаҳар) Кенгашларига олис ва чекка ҳудудларда жойлашган ер участкасидан доимий фойдаланиш ҳуқуқини аукционга қўйишда уларнинг бошланғич нархини 50 фоизгача камайтириш ваколати берилди.

Шунингдек, Қорақалпоғистон РеспубликасиЖўқорғи Кенгеси ва халқ депутатлари вилоятлар Кенгашларига ер участкасидан доимий фойдаланиш ҳуқуқини аукционга қўйишда бошланғич нархга чегирма белгиланадиган олис ва чекка худудлар чегараларини белгилаш ваколати берилди.

2021 йил 1 июндан бошлаб инфратузилмага яқин жойларда, белгиланган тартибда тасдиқланган рўйҳат бўйича унумдорлиги паст, фойдаланишда бўлмаган қишлоқ хўжалиги ерларини саноат ва хизмат кўрсатиш объектларини барпо этиш учун лойиҳа асосида инвесторларга “E-IJRO AUKSION” савдо майдончасида электрон онлайн-аукцион орқали ажратилади.

2021 йил 1 июндан бошлаб қуйидаги тартиб амалга оширилади:

• 3 йилдан ортиқ вақтдан буён фаолият кўрсатаётган ҳамда ҳисобланган солиқларни муддатида тўлаб келган, лекин молиявий аҳволига кўра солиқ қарзини тўлаш имкониятига эга бўлмаган тадбиркорлик субъектларига солиқларни бўлиб-бўлиб тўлаш;
• 3 йилдан ортиқ вақтдан буён товарларни импорт қилиш билан шуғулланаётган, божхона тўловлари бўйича мажбуриятларини бажариб келган, лекин молиявий аҳволига кўра тўловларни белгиланган муддатда тўлаш имкониятига эга бўлмаган ташқи иқтисодий фаолият иштирокчиларига божхона тўловларини бўлиб-бўлиб тўлаш ҳуқуқи берилади.

Ушбу тартибда гаровсиз бўлиб-бўлиб тўланадиган солиқ ёки тўловлар суммаси тадбиркорлик субъекти томонидан охирги 3 йил давомида тўланган солиқ ёки божхона тўловлари суммасинининг 50 фоизидан ошмаслиги лозим.

2021 йил 1 майдан бошлаб чет элдан хорижий валютадаги тушум тушиши кечиктирилишига йўл қўйган экспорт қилувчилар ва “эркин муомалага чиқариш” божхона режимида товарларни республикага олиб кириш ва расмийлаштиришни, ишларни бажариш ёки хизматлар кўрсатишни ўз вақтида таъминламаган импорт қилувчилар учун қонунчиликда белгиланган жарима миқдорлари 2 бараварига камайтирилади.

2021 йилш 1 май ҳолатига шаклланган ташқи савдо операциялари бўйича муддати ўтган дебитор қарздорлик учун хўжалик юритувчи субъектларга жарималар қўллаш тўхтатилади ва дебитор қарздорлик вужудга келиш муддатлари 2021 йил 1 майдан бошлаб янгидан ҳисобланади.

Кадастр агентлиги томонидан 2021 йил 1 сентябрга қадар жисмоний ва юридик шахсларга  “YERELEKTRON” автоматлаштирилаётган қурилиш объекти тўғрисидаги маълумотларни электрон онлайн-аукционга жойлаштириш ва ер участкаларини кузатиш имконини берувчи мобил иловани ишга туширади.

2021 йил 1 октябрдан бошлаб ижро ишини юритиш доирасида қарздордан ундирилган пул суммалари ижро ҳужжатлари бўйича барча талабларни қаноатлантириш учун етарли бўлмаган тақдирда, бюджетга тўловлар бўйича талаблар, кредиторларнинг қарздор мол-мулки билан таъминланмаган талаблари, шу жумладан қарздорнинг мажбуриятлари бажарилишининг таъминоти сифатида турган мол-мулкни реализация қилишдан тушган сумма етарли бўлмаганлиги туфайли қаноатлантирилмаган талаблари бир навбатда (тўртинчи навбатда) қаноатлантирилади.

ССП Ахборот-хизмати