Ўзбекистон Савдо-саноат палатаси томонидан яна бир тадбиркорнинг ҳуқуқ ва қонуний манфаатлари ҳимоя қилинди

Ўзбекистон Савдо-саноат палатасига унинг аъзоси “Qurilishtransgazservis” МЧЖ мурожаат қилиб, ҳуқуқ ва қонуний манфаатларини ҳимоя қилишда амалий ёрдам сўраган.

“Qurilishtransgazservis” МЧЖ мурожaати ўрганиб чиқилганда, жамият ва Республикада фаолият юритувчи давлат унитар корхонаси ўртасида хизмат кўрсaтиш шартномаси имзоланганлиги, Давлат унитар корхонаси томонидан шартнома бўйича ўз мажбуриятлари лозим даражада бажарилмаганлиги натижасида тадбиркор зарар кўрганлиги аниқланди. 

Давлат унитар корхонаси шартнома шартларини лозим даражада бажармаганлиги оқибатида етказилган зарарни ундириш юзасидан Савдо-саноат палатаси томонидан Палата аъзоси манфаатида судга даъво аризаси билан мурожаат қилинган.

Тошкент туманлараро иқтисодий судининг ҳал қилув қарори билан ДУК ҳисобдан “Qurilishtransgazservis” МЧЖ фойдасига 37 582 000 сўм миқдоридаги асосий қарз ҳамда 8 000 000 сўм миқдорида пеня ундириб берилган ва, шу тариқа, Палата аъзосининг ҳуқуқ ва қонуний манфаатлари ҳимоя қилинган.

ССП Ахборот-хизмати