Қозоғистон Республикаси Савдо ва интеграция вазири Б.Султанов билан Ўзбекистон Савдо-саноат палатасида учрашув бўлиб ўтди.

2021 йил 26 июнь куни Ўзбекистон Савдо-саноат палатаси раиси А.Икрамов томонидан Қозоғистон Республикаси Савдо ва интеграция вазири Б.Султанов бошчилигидаги делегация билан учрашув ўтказилди.

Учрашувда Қозоғистон Республикаси ва Ўзбекистон Республикаси ўртасида савдо-иқтисодий ва инвестициявий ҳамкорлик муносабатларини ривожлантириш масалалари атрофлича муҳокама этилди.

Таъкидлаб ўтилганидек, 2020 йилда икки давлат ўртасидаги ўзаро товар айланмаси 3 млрд.доллардан ошган бўлсада, бироқ бу кўрсаткич Қозоғистон ва Ўзбекистоннинг иқтисодий салоҳиятига тўлиқ жавоб бермайди. Бу борада томонлар турли тармоқлар, ҳудудлар ва ишбилармон доиралари ўртасида ҳамкорлик алоқаларини янада ривожлантиришнинг муҳим йўналишлари ва унда амалга ошириладиган чора-тадбирлар тўғрисида фикр алмашдилар.

Учрашувда Томонлар айниқса, саноат кооперацияси ҳамда икки давлат ҳудудлари ўртасида тадбиркорларни фаол ҳамкорлик қилиш масалаларига алоҳида тўхталиб ўтдилар.

Бу борада икки давлат ўртасида талаб юқори бўлган маҳсулотлар бўйича ўзаро савдо айланмасини янада ошириш юзасидан товар номенклатурасини кенгайтиришнинг мақсадга мувофиқлиги эътироф этилди.

Шунингдек, томонлар миллий товарларни учинчи давлатларга етказиб бериш, жумладан Афғонистон орқали бошқа хорижий бозорларга экспорт қилиш борасида транзит соҳасида ҳам ҳамкорлик қилиш масалаларига батафсил тўхталиб ўтдилар.

Учрашув якунида томонлар муҳокама этилган масалалар бўйича ҳамкорликда чора-тадбирларни амалга оширишга келишиб олдилар ва бу борада биргаликда олиб бориладиган сайъ-ҳаракатлар бўйича масъулларни тайинладилар.

ССП Ахборот-хизмати