Ўзбекистон – Покистон бизнес-форуми бўлиб ўтди

Ушбу тадбирга расмий ташриф билан мамлакатимизда бўлиб турган Покистон Ислом Республикаси Бош вазири Имрон Хон ҳамда Ўзбекистон Республикаси Бош вазири Абдулла Арипов ташриф буюришди. 

Бизнес форумда мамлакатимизнинг тегишли вазирлик, идора  ва тармоқ бирлашмалари раҳбарлари ҳамда икки мамлакат ишбилармон доираларининг 300 дан зиёд вакиллари иштирок этди.

Ушбу ташриф ва Олий даражадаги учрашув ҳамда музокаралар мамлакатларимиз ҳамкорлигида барча тармоқларни қамраб оладиган янги саҳифа очиши, кўп қиррали Ўзбекистон – Покистон шериклигини ривожлантиришга кучли туртки бериши алоҳида таъкидланди.

Ўзбекистонда тадбиркорлик фаолиятини қўллаб-қувватлаш ва инвесторлар учун қулай муҳит яратиш бўйича кўрилаётган чоралар эътироф этилди. Солиқни тартибга солиш соҳасини ислоҳ қилиш, иқтисодиёт шаффофлигини ошириш, ер майдонларини ажратиш тартиб-таомилларини, хорижий инвесторларни ҳуқуқий жиҳатдан ҳимоя қилиш механизмларини такомиллаштиришдаги ва бошқа соҳалардаги ютуқлар санаб ўтилди.

Охирги йилларда Ўзбекистон ва Покистон ўртасида товар айирбошлаш ҳажми мунтазам ошиб бормоқда.
Мисол учун, 2021 йил январь-май ойларида ўзаро товар айирбошлаш ҳажми 69,4 миллион долларни (+ 158,8%) ташкил этди, шу жумладан экспорт -47,6 миллион доллар (+ 159,2% марта), импорт -24,8 миллион доллар (-72%).

Форум доирасида вазирлик ва идоралар раҳбарларининг тақдимотлари бўлиб ўтди. Уларда туризм, енгил саноат, қишлоқ хўжалиги, фармацевтика, кимё саноати соҳаларида ва бошқа йўналишларда қўшма лойиҳаларни амалга ошириш имкониятлари намойиш этилди.

Форум якунлари бўйича инвестиция лойиҳаларини ва савдо битимларини амалга ошириш бўйича  қатор ҳужжатлар имзоланди.

ССП Матбуот хизмати