ШҲТ Ишбилармонлар Кенгаши йиғилиши

Жорий йилнинг 7 сентябрида видеоконференцалоқа форматида ШҲТ Ишбилармонлар кенгаши йиғилиши бўлиб ўтди.

Бу йил мазкур йиғилиш ШҲТ Ишбилармонлар Кенгаши миллий қисмининг Тожикистон Республикаси раиси Д.Жумахонзода томонидан олиб борилди.

Учрашувда ШҲТ Бош котиби В.Норов, ШҲТ Ишбилармонлар Кенгашининг ижрочи котиби С.Канавский, Ўзбекистон Республикасидан ШҲТ Ишбилармонлар Кенгаши қисмининг раиси A.Икрамов, шунингдек, ШҲТга аъзо бўлган ШҲТ Ишбилармонлар Кенгаши Миллий қисм раислари иштирок этишди. 

Ушбу тадбир давомида ШҲТ Бош котиби В.Норов ўз нутқи давомида иштирокчи давлатлар ўртасидаги савдо-иқтисодий ва гуманитар алоқаларни мустаҳкамлаш, кўп тармоқли ҳамкорлик механизмларини такомиллаштириш ва Ташкилотнинг халқаро нуфузини оширишга қаратилган курснинг жадал ривожланаётганлигини таъкидлади. 

Шунингдек, Ўзбекистон Республикаси Ишбилармонлар Кенгашининг ШҲТ Миллий қисми раиси А.Икрамов ўз маърузасида ШҲТ давлатлари раҳбарларининг саъй-ҳаракатлари, юқори даражадаги мунтазам учрашув ва мулоқотлар туфайли иштирокчи мамлакатлар ишбилармон доиралари ўртасидаги ҳамкорлик жадал билан ривожлаётганлигини таъкидлаб ўтди.

Шу билан бирга, сўнгги йилларда Ўзбекистон Савдо-саноат палатасининг ШҲТ ИК ишидаги асосий саъй-ҳаракатлари ташкилотга аъзо давлатлар, кузатувчилар ва мулоқот шерикларининг бизнес тузилмаларига ёрдам беришга қаратилгани ҳамда ўзаро манфаатли лойиҳалар, шунингдек, ҳамкорликнинг янги соҳаларида самарадорликни ошириш борасида сўз юритилди.

Сўнгра, ШҲТ Ишбилармонлар Кенгашининг фаолияти тўғрисидаги ҳисоботлар, шунингдек, ШҲТ Ишбилармонлар Кенгаши ижрочи котибининг маълумотлари тингланди.

Шунингдек, кун тартибидан пилот лойиҳалар ва тақдимот масалалари муҳокамаси ўрин олди. Ўзбекистон томонидан қуйидаги қатор таклифлар илгари сурилди:
- экспорт қилувчи компанияларга божхона имтиёзлари бериш, ташқи савдо бозорларига чиқиш учун зарур шарт-шароитларни яратиш, ШҲТга аъзо давлатлар ўртасидаги савдо тартибини соддалаштириш, шунингдек сертификатлар ва талаблар сонини камайтириш;
- ШҲТ Ишбилармонлар кенгаши, Савдо-саноат палаталари ва шерик мамлакатларнинг бизнес тузилмаларининг роли ва масъулиятини оширадиган савдо-иқтисодий, молиявий-техник, транспорт, алоқа ва сармоявий ҳамкорликни ривожлантириш;
- ШҲТга аъзо давлатлар ишбилармон доиралари ўртасида савдо-сотиқни кенгайтириш учун қонунчилик платформаси ва қулай шарт-шароитларни яратиш.

Ушбу таклифлар билан бир қаторда, Савдо-саноат палаталари базасида икки томонлама ва кўп томонлама форматдаги ишбилармон доиралар иштирокида мунтазам равишда онлайн бизнес-форумлар ва учрашувлар ўтказилишини қўллаб-қувватлаш  ва шу билан бирга, ШҲТдаги ҳамкорлар ҳудудида Савдо уйлари очилишига кўмаклашиш истаги билдирилди.

Тадбир сўнгида ШҲТ Ишбилармонлар Кенгаши йиғилишининг Протоколи имзоланди, унда ШҲТ Ишбилармонлар кенгашининг навбатдаги йиғилишини 2022 йил июнь ойида Ўзбекистон Республикасида ўтказиш тўғрисида қарор қабул қилинди.

ССП Ахборот-хизмати