Назорат қилувчи органлар мансабдор шахсларини тадбиркорлик субъектлари фаолиятини текшириш ҳуқуқини бериш юзасидан аттестациядан ўтказилмоқда

Ўзбекистон Республикаси Вазирлар Маҳкамасининг 2018 йил 7 ноябрдаги 920-сонли қарори билан тасдиқланган “Назорат қилувчи органлар мансабдор шахсларини тадбиркорлик субъектлари фаолиятини текшириш ҳуқуқини бериш юзасидан аттестациядан ўтказиш тартиби тўғрисида”ги Низом талабларига кўра назорат қилувчи органлар мансабдор шахсларига тадбиркорлик субъектлари фаолиятини текшириш ҳуқуқини бериш юзасидан ўтказиладиган аттестация жараёнларида Савдо-саноат палатаси вакиллари комиссия аъзоси сифатида иштирок этиб келмоқда.

Жумладан, жорий йилнинг 13-17 сентябрь кунлари Тошкент шаҳар давлат солиқ бошқармаси биносида туман солиқ инспекциялари ва бошқарманинг тадбиркорлик субъектлари фаолиятини текшириш ҳуқуқига эга бўлиш учун тавсия этилган ходимлари малакаси ва профессионаллик даражасини баҳолаш, шунингдек, уларнинг тадбиркорлик субъектлари фаолиятини текширишга тааллуқли қонун ҳужжатлари талабларига риоя этилиши учун масъулиятини ошириш мақсадида ташкил этилган аттестация жараёнида Палатанинг Тошкент шаҳар ҳудудий бошқармаси бошлиғи ўринбосари иштирок этди.

Комиссияси аъзоси томонидан аттестациядан ўтувчи ходимлар ҳақидаги тавсифнома ва саволларга берилган жавобларни инобатга олган ҳолда ҳар бир аттестациядан ўтувчи ходимга нисбатан очиқ овоз бериш йўли билан алоҳида қарор қабул қилинди. Якуний ҳулосага кўра 128 нафар ходимга тадбиркорлик субъектларини текшириш ҳуқуқини берувчи махсус гувоҳнома бериш тавсия этилган бўлса, 22 нафар ходим аттестациядан ўта олмади.

ССП Ахборот-хизмати