Қорақалпоғистон Республикасида Коррупцияга қарши курашиш бўйича худудий кенгаши йиғилиши бўлиб ўтди.

Жорий йил 7 октябрь куни Нукус шаҳрида Қорақалпоғистон Республикаси Коррупцияга қарши курашиш бўйича ҳудудий кенгаши йиғилиши бўлиб ўтди. Унда Қорақалпоғистон Миллий кенгаши аъзолари, даҳлдор ташкилотлар раҳбарлари, шунингдек Коррупцияга қарши курашиш Агентлиги директори Акмал Бурханов ҳамда Ўзбекистон Савдо-саноат палатасидан бошқарма бошлиғи Бобур Ибадуллаев иштирок этди.

Йиғилишга Қорақалпоғистон Республикаси Жўқорғи Кенгеси Раиси Камалов Мурат Каллибекович ва Коррупцияга қарши курашиш агентлиги директори Бурханов Акмал Эшондедаевич раислик қилди.

Коррупцияга қарши курашиш агентлиги директори Акмал Бурханов  коррупцияга қарши курашиш йўналишида амалга оширилаётган чора-тадбирлар ва улар ижросида ҳудудий кенгашларнинг ўрни хусусида сўз юритиб, жойларда кенг кўламли ишлар олиб борилишига қарамай коррупцион ҳолатларга дуч келинаётганлиги таъкидлади. Шундай ҳолатларга барҳам бериш мақсадида эндиликда ҳудудий кенгашлар фаолият юритади ва улар коррупцияга қарши курашиш соҳасидаги давлат ва бошқа дастурларнинг амалга оширилишини ташкил этади, тегишли ҳудудда коррупцияга қарши курашиш бўйича фаолиятни амалга оширувчи ва унда иштирок этувчи органлар ҳамда ташкилотларнинг фаолиятини мувофиқлаштириб боради ва ҳамкорлигини таъминлайди. Аҳолининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантиришга доир чора-тадбирларни ишлаб чиқади ва ўз фаолиятини белгиланган вазифалар ижросини таъминлашга қаратади.

Ўзбекистон Савдо-саноат палатаси бошқарма бошлиғи Бобур Ибадуллаев  ўз маърузасида коррупцияга қарши курашиш борасида Палата томонидан амалга оширилаётган ишлар тўғрисида ахборот берди. Жумладан, жамоатчилик назоратининг қуйидаги усулларини қўллаб, бизнес ҳамжамияти ўртасида коррупцияга қарши курашга ўз хиссасини қўшиб келмоқда:

1. Кундалик фаолиятида дуч келаётган коррупцион ҳолатлар ва уларга нисбатан тадбиркор фикрини ўрганиш мақсадида ҳар йили ижтимоий тармоқлар ва интернет орқали тадбиркорлар ўртасида сўровномалар ўтказиб келинмоқда, якунлари умумлаштирилиб, Палата сайтида жойлаштириб борилмоқда;

 2. Тадбиркорлар ўз фаолиятида учрайдиган коррупцион ҳолатларга  муносабати ҳамда банк муассасалари билан ўзаро муносабатларда юзага келаётган муаммолар тўғрисида ижтимоий тармоқлар ва интернет орқали сўровномалар ўтказилди;

 3. Турли соҳалар бўйича ишлаб чиқилаётган норматив-ҳуқуқий ҳужжатлар лойиҳалари уларда тадбиркорлик фаолиятига таъсири ҳамда коррупцион ҳолатларга олиб келиши мумкин бўлган ҳолатларни аниқлаш мақсадида жамоатчилик экспертизасидан ўтказиб келинмоқда;

 4. Назорат қилувчи органлар томонидан тадбиркорлик субъектлари фаолиятида ўтказиладиган текширувлар объектив ва шаффоф ўтказилиши ва бунда текширув субъектлари ўртасида коррупцион муносабатлар олдини олиш учун бундай текширувларда Палата ходимлари бевосита иштирок этиб келишмоқда;

 5. Текширувлар малакали ва тажрибали ходимлар томонидан ўтказилишини таъминлаш мақсадида, назорат қилувчи органларнинг мансабдор шахсларига бундай текширув ўтказишга махсус гувоҳнома бериш учун ўтказиладиган аттестацияларда Палата ходимлари комиссия аъзоси сифатида фаолият кўрсатиб келмоқда.

 6. Палатага тадбиркорлик субъектларидан келиб тушаётган ариза ва шикоятлар ўрнатилган тартибда кўриб чиқилмоқда, уларда баён этилаётган муаммолар ва фаолиятга қилинаётган тўсқинликлар атрофлича таҳлил қилиниб, муаммолар ечимини топиш мақсадида тегишли ваколатли давлат органлари билан ҳамкорликда зарур чоралар кўрилмоқда ва мазкур жараён устидан жамоатчилик назорати юритиб келинмоқда.  

 Шу билан бир қаторда тадбиркорларнинг ҳуқуқий саводхонлиги ва маданиятини ошириш борасида тегишли ишлар амалга оширилмоқда. Хусусан, бизнес юритиш ва бизнес айирбошлашнинг тан олинган жаҳон стандартларини ҳисобга олган холда аҳлоқий меъёрларини бирхиллаштириш, аҳлоқий ва халол ҳулқ-атворни тарғиб қилиш, қонунбузарликлар ва коррупциянинг олдини олиш мақсадида, Бизнес юритиш этикаси кодекси ишлаб чиқилди ва ЕХХТнинг молиявий кўмагида 40 минг нусҳада чоп этилиб, тадбиркорлик субъектлари ўртасида тарқатилди.

Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш Вакил билан ҳамкорликда, Ўзбекистонда Бизнеснинг коррупцияга қарши курашиш хартияси ишлаб чиқилди.

Ҳартиянинг мақсади – бу ишбилармон доира вакиллари томонидан ўз фаолиятида коррупцион амалиётини чеклашни жорий этишга қаратилган ҳужжат. Ҳартияга қўшилган тадбиркорлар ўзининг коррупцияга тоқатсизлигини тасдиқлайди. Хартия бизнеснинг рақобатбардошлигини оширишга, шу билан бирга, бизнес юритишда коррупцияга қарши курашиш маданияти шакллантирилиши билан тадбиркорлик фаолиятини юритиш учун қулай шарт-шароитлар яратилишига хизмат қилади.

ССП Ахборот-хизмати