Ўзбекистон Савдо-саноат палатаси

Рухсат этиш хусусиятига эга ҳужжатсиз тадбиркорлик фаолияти билан шуғулланганлик учун жавобгарлик кучайтирилди

12.10.2021 йилдаги «Лицензиялаш, рухсат бериш ва хабардор қилиш тартиб-таомиллари тўғрисида»ги Қонун қабул қилинганлиги муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш ҳақида»ги ЎРҚ-721-сон Қонун қабул қилинди.

Қонун билан ФК, МЖТК ва ЖКга ўзгартиришлар киритилди.

ФКнинг 53-моддаси 3-хатбошида белгиланишича, юридик шахс фаолият лицензиясиз, фаолият (ҳаракатлар) рухсатномасиз ёхуд ваколатли органни хабардор қилмасдан) амалга оширилган тақдирда суднинг қарорига кўра тугатилиши мумкин.

ФКнинг 289-моддаси 1-қисмида белгиланишича, фуқаролардан шахсий истеъмолга мўлжалланган кўчар мол-мулкни қисқа муддатли кредитларни таъминлаш учун гаровга қабул қилиш ихтисослашган ташкилотлар - фаолиятини хабардор қилиш тартибида амалга оширадиган ломбардлар томонидан тадбиркорлик фаолияти сифатида амалга оширилиши мумкин.

МЖТКнинг 165-моддасида лицензиялаш, рухсат бериш ва хабардор қилиш тартиб-таомиллари тўғрисидаги қонунчиликни бузганлик учун жавобгарлик белгиланди.

Ҳуқуқбузарлик	Жарима миқдори (БҲМ)
фаолиятни (ҳаракатларни) хабардор қилиш тартибида амалга ошираётган шахс томонидан ваколатли органга қонунчиликда мазкур фаолият учун белгиланган талаблар ва шартлар бажарилганлиги тўғрисида ёлғон ёки нотўғри ахборот тақдим этиш	фуқароларга	3 БҲМдан 5 БҲМгача
	мансабдор шахсларга	5 БҲМдан 10 БҲМгача
Ушбу фаолият (ҳаракат) билан:
хабарнома юбормасдан шуғулланиш	фуқароларга	5 БҲМдан 10 БҲМгача
хабарнома юбормасдан шуғулланиш	мансабдор шахсларга	10 БҲМдан 15 БҲМгача
рухсат этиш хусусиятига эга ҳужжатсиз шуғулланиш	фуқароларга	10 БҲМдан 15 БҲМгача
рухсат этиш хусусиятига эга ҳужжатсиз шуғулланиш	мансабдор шахсларга	15 БҲМдан 20 БҲМгача
лицензиясиз шуғулланиш	фуқароларга	15 БҲМдан 20 БҲМгача
лицензиясиз шуғулланиш	мансабдор шахсларга	20 БҲМдан 25 БҲМгача

Шунингдек МЖТК 245⁹-модда билан тўлдирилди, унга мувофиқ лицензиялаш, рухсат бериш ва хабардор қилиш тартиб-таомиллари соҳасидаги ваколатли органлар, шунингдек уларнинг ҳудудий бўлинмалари раҳбарлари ва ўринбосарлари ушбу ҳуқуқбузарликлар аниқланган тақдирда, маъмурий ҳуқуқбузарлик тўғрисида баённома тузади ҳамда уни судга кўриб чиқиш учун юборади.

ЖКнинг 190-моддасида фаолият билан лицензиясиз шуғулланганлик учун жавобгарликдан ташқари, фаолият билан рухсат этиш хусусиятига эга ҳужжатсиз шуғулланганлик учун жавобгарлик кучайтирилди.

Ҳуқуқбузарлик	санкция
Хабардор қилиш тартибида амалга оширилиши лозим бўлган фаолият (ҳаракатлар) билан хабарнома юбормасдан шуғулланиш жуда кўп миқдорда даромад олиш билан боғлиқ бўлса	25 БҲМ миқдорида жарима; ёки бир йилгача муайян ҳуқуқлардан маҳрум қилиш; ёхуд 160 соатгача мажбурий жамоат ишлари билан жазоланади
Ушбу ҳаракатлар хавфли рецидивист томонидан, бир гуруҳ шахслар томонидан олдиндан тил бириктириб содир этилган бўлса	70 БҲМ миқдорида жарима; ёки 200 соатдан 300 соатгача мажбурий жамоат ишлари билан жазоланади
Фаолият (ҳаракатлар) билан рухсат этиш хусусиятига эга ҳужжатсиз шуғулланиш жуда кўп миқдорда даромад олиш билан боғлиқ бўлса	40 БҲМ миқдорида жарима; ёки 2 йилгача муайян ҳуқуқлардан маҳрум қилиш; ёхуд 230 соатгача мажбурий жамоат ишлари; ёки 10 ойгача ахлоқ тузатиш ишлари билан жазоланади
Ушбу ҳаракатлар хавфли рецидивист томонидан, бир гуруҳ шахслар томонидан олдиндан тил бириктириб содир этилган бўлса	90 БҲМ миқдорида жарима; ёки 250 соатдан 400 соатгача мажбурий жамоат ишлари билан жазоланади
Лицензияланиши лозим бўлган фаолият билан лицензиясиз шуғулланиш жуда кўп миқдорда даромад олиш билан боғлиқ бўлса	55 БҲМ (илгари – 25 БҲМдан 75 БҲМгача) миқдорида жарима; ёки 5 йилгача муайян ҳуқуқдан маҳрум қилиш; ёхуд 300 соатгача мажбурий жамоат ишлари; ёки 3 йилгача муддатга ахлоқ тузатиш ишлари билан жазоланади
Ушбу ҳаракатлар хавфли рецидивист томонидан, бир гуруҳ шахслар томонидан олдиндан тил бириктириб содир этилган бўлса	100 БҲМ (илгари – 75 БҲМдан 100 БҲМгача) миқдорида жарима; ёки 300 соатдан 480 соатгача мажбурий жамоат ишлари билан жазоланади

Биринчи марта жиноят содир этган шахс, агар у жиноят аниқланган кундан эътиборан 30 кунлик муддатда фаолият билан лицензиясиз, шунингдек фаолият (ҳаракатлар) билан рухсат этиш хусусиятига эга ҳужжатсиз ёки хабарнома юбормасдан шуғулланиш оқибатларини бартараф этган ва етказилган моддий зарарнинг ўрнини қоплаган бўлса, жавобгарликдан озод этилади.

Ҳужжат Қонун ҳужжатлари маълумотлари миллий базасида эълон қилинган ва 12.10.2021 йилдан кучга кирди.

Манбаа: Norma.uz

ССП Ахборот-хизмати

21.10.2021

10:54

Саволлар беринг