“Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун мазмун-моҳиятини тушунтириш бўйича аннотация

“Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун (14.10.2021 й.) ЎРҚ–722-cон Қонун мазмун-моҳиятини тушунтириш бўйича

АННОТАЦИЯ

Қонун билан Солиқ кодексига бир қатор ўзгартиришлар киритилди.

Хусусан, Солиқ кодекснинг 99-моддасига киритилган ўзгартиришга кўра, Давлат солиқ қўмитаси солиқларни, шунингдек айланмадан олинадиган солиқни белгиланган тартибда мол-мулкни гаровга бермаган ҳолда, кафилликсиз ёки банк кафолатисиз бўлиб-бўлиб тўлаш имкониятини тақдим этишга ҳақли эканлиги белгиланди (бундан даромад солиғи, ижтимоий солиқ, тўлов манбаида олинадиган фойда солиғи мустасно).

Солиқ кодекснинг 100-моддасига киритилган қўшимчага кўра, фаолиятни 3 йилдан ортиқ вақтдан буён амалга ошираётган, солиқларни ўз вақтида тўлаган, аммо молиявий аҳволи солиқ қарзини муддатида тўлаш имкониятига эга бўлмаган манфаатдор шахсларга солиқларни бўлиб-бўлиб тўлаш имконияти берилиши мумкин.

Солиқ кодекснинг 378-моддасига киритилган ўзгартиришларга кўра, солиқ тўловчининг Ўзбекистон Республикасининг профессионал (касб-ҳунар мактаблари, коллежлар, техникумлар) ва олий таълим ташкилотларида таълим олиш (ўзининг, шунингдек 26 ёшга тўлмаган фарзандларининг ёки эрининг (хотинининг) таълим олиши) учун  йўналтириладиган даромадлари солиққа тортилмайди.

Маълумот учун илгари ушбу имтиёз фақат олий таълим бўйича татбиқ этилган.

“Ўзбекистон Республикаси Олий Мажлиси Қонунчилик палатаси депутатининг ва Сенати аъзосининг мақоми тўғрисида”ги Қонунга қўшимча киритилиб депутатнинг ёрдамчиси институти қонунчиликка татбиқ этилди. Унга кўра, депутатликка номзод этиб кўрсатган сиёсий партия билан алоқасини сақлаб туриш ҳамда ўз сайлов округидаги фаолиятини самарали ташкил этиш учун депутатга ёрдамчи олиш ҳуқуқи берилди.

Божхона кодексининг 329-моддасига киритилган қўшимчага кўра, товарларни импорт қилиш билан уч йилдан ортиқ вақтдан буён шуғулланаётган, божхона тўловлари бўйича мажбуриятларини яхши (ёки ўз вақтида) бажариб келган тадбиркорлик субъектларига божхона тўловларини бўлиб-бўлиб тўлаш ҳуқуқи берилди.

Асос. 14.10.2021 й. ЎРҚ–722-cон Қонун.