МДҲ давлатлари Савдо-саноат палаталари раҳбарлари Кенгашининг 19 – йиғилиши бўлиб ўтди.

2021 йилнинг 17 ноябрь куни Тожикистон Республикаси Савдо-саноат палатаси раҳбарлигида Мустақил давлатлар ҳамдўстлигига аъзо мамлакатлар Савдо-саноат палаталарининг 19 – йиғилиши бўлиб ўтди.

Бу йилги йиғилиш “Янги воқеликда палаталараро ҳамкорликни ривожлантириш, Савдо-саноат палаталарининг вазифа ва функциялари” мавзуси остида ташкил этилиб, ўтган давр мобайнида МДҲ мамлакатлари ўртасида йўлга қўйилган ҳамкорлик, келлгуси даврда амалга ошириладиган лойиҳалар, тадбирлар ва кейинги йилда ташкил этиладиган йиғилиш масалалари юзасидан мулоқот олиб борилди.

Йиғилиш кун тартибидан: МДҲга аъзо Давлатларнинг 2030-йилгача бўлган даврда инновацион ҳамкорликнинг Давлатлараро дастурини йўлга қўйиш;

2022-йилда МДҲ Палаталари Раҳбарлари Кенгаши ҳомийлигида ўтказиш таклиф этилаётган кўргазма-ярмарка тадбирлари рўйхатини тасдиқлаш;

МДҲ палаталари раҳбарлари кенгашининг ХIХ мажлиси қарорининг имзолаш  ва шу каби масалалар ўрин олди.

Маълумот учун: Кенгашнинг асосий мақсади мамлакатлар ўртасида ҳамкорликни ривожлантиришга кўмаклашиш, ҳамкорлик жараёнларида инновацион ривожланиш, кичик ва ўрта бизнесни қўллаб-қувватлаш ва ривожлантириш масалалари, МДҲга аъзо давлатларда Савдо-саноат палаталари ролини ошириш, кўргазма-ярмаркалар фаолиятларини фаоллаштириш, ягона ахборот маконини яратиш, ҳудудлараро ва трансчегаравий ҳамкорликни кенгайтириш, давлат-хусусий шериклик механизмларини ишлаб чиқиш, бизнес учун кадрлар тайёрлаш ва бошқа шу каби масалалар ҳисобланади.

2020-йилнинг 9-сентябрь куни Тошкент шаҳрида Ўзбекистон Республикаси Савдо-саноат палатаси раислигида МДҲга аъзо давлатлар палаталари раҳбарлари кенгашининг 18-мажлиси видеоконференцалоқа форматида бўлиб ўтган эди. Йиғилиш доирасида “Тошкентда Ҳамдўстлик ишбилармонлик ташаббуслари" ҳафталиги ташкил этилган.

XIX йиғилиш бошида МДҲ Ижроия қўмитаси раиси, Ижрочи котиби С.Лебедев йиғилиш қатнашчиларига миннатдорлик билдириб, самарали мулоқот майдони ташкил этилишига, истиқболли лойиҳалар амалга оширилишига ишонч билдирди.

Юқорида таъкидланганидек бу йилги МДҲ Савдо-саноат палаталари раҳбарлари Кенгаши йиғилишига Тожикистон мамлакати мезбонлик қилди. Йиғилиш видеоконференцалоқа форматида ташкил этилишига қарамай, барча Савдо-саноат палаталари раҳбарлари изчил тайёргарлик билан иштирок этишди.

Жумладан, Ўзбекистон Савдо-саноат палатаси раиси А.Икрамов ўз нутқи давомида, кенгаш йиғилишида қатнашаётган барча мамлакатлар Савдо-саноат палаталарига ўтган давр мобайнида ўрнатилган ҳамкорлик ва ўтказилган тадбирлар учун алоҳида миннатдорлик билдириб ўтди. Шу билан бирга кун тартибидан ўрин олган масалалар юзасидан маълумотлар берилди. 

Шунингдек йиғилиш давомида Россия Федерацияси, Арманистон, Беларусия, Қозоғистон, Қирғизистон, Молдова, Озарбайжон, Туркманистон давлатлари Савдо-саноат палаталарининг раҳбар ва вакиллари ҳам мавзулар досирасида ўз нутқлари билан иштирок этдилар.

Тадбир якунида Мустақил давлатлар ҳамдўстлигига аъзо мамлакатлар Савдо-саноат палаталари раҳбарлари иштирокида Кенгашининг 19-йиғилиши қарорини имзолаш маросими ташкил этилди.

Маълумот учун: Мустақил давлатлар ҳамдўстлигига аъзо мамлакатлар Савдо-саноат палаталари раҳбарлари Кенгашининг 2022 йилда ўтказилиши режалаштирилган 20 йиғилишига Туркманистон Республикаси мезбонлик қилади.

ССП Матбуот хизмати