Сирдарё вилоятида "Товар белгиларига эгалик ҳуқуқлари ҳимояси" мавзусида семинар тренинг бўлиб ўтди

Ҳабарингиз бор, Савдо-саноат палатаси ҳамда Интеллектуал мулк агентлиги томонидан Ўзбекистон Республикаси Президентининг 2021 йил 28 январдаги “Интеллектуал мулк объектларини муҳофаза қилиш тизимини такомиллаштириш чора-тадбирлари тўғрисида”ги ПҚ-4965-сон қарорида кўрсатилган топшириқлар ижросини таъминлаш мақсадида Республиканинг ҳар бир маъмурий бирликларида тадбиркорлик фаолиятини ташкил этаётган шахслар учун ўз брендига эга бўлишнинг афзаллиги бўйича Ўзбекистон ва халқаро миқёсда тан олинган миллий брендлар эгалари бўлган ишбилармонлар иштирокида мастер-класслар ташкил этилмоқда.

Жорий йилнинг 17-ноябрь куни Ўзбекистон Савдо-саноат палатаси Сирдарё вилоят ҳудудий бошқармаси ва Адлия вазирлиги ҳузуридаги Интеллектуал мулк агентлиги ҳамкорлигида жамиятда интеллектуал мулк объектларига бўлган ҳуқуққа нисбатан ҳурмат билан қараш маданиятини шакллантиришга қаратилган  ҳамда интеллектуал мулк соҳасида амалга оширилаётган ислоҳотларни қўллаб-қувватлашда тарғибот-ташвиқот ишларини янада кучайтириш мақсадида тадбир бўлиб ўтди.                       

Учрашувда Республикаси Адлия вазирлиги ҳузуридаги Интелектуал мулк агентлиги Сирдарё вилояти бўлими раҳбари Х.Илашев,   Савдо-саноат палатаси Сирдарё вилояти ҳудудий бошқармаси қошидаги “Гулистон Бизнес Мактаби” директори С.Эгамқулов иштирок этдилар. Бундан ташқари “GULISTON LIMON EXPORT” МЧЖ раҳбари Д.Усмонова, «ELEGANT SHARQ ZIYOSI» НТМ раҳбари О.Бекмирзаевлар каби вилоятнинг таниқли тадбиркорлари иштирок этишди.

Тадбирда интелектуал мулк объектларини давлат рўйхатидан ўтказиш ва муҳофаза қилиш, хусусан товар белгилари ва хизмат кўрсатиш белгиларининг (бренд) давлат рўйҳатидан ўтказиш тартиблари, унинг аҳамияти ва афзалликлари, уларни муҳофаза қилиш,  қонун ҳужжатларига асосан тадбиркорлик субъектларига яратиб берилган имтиёзлар ҳамда бошқа ҳолатлар юзасидан тушунчалар берилди.  

Қолаверса, товар белгисига эга тажрибали тадбиркорлар, ўз тадбиркорлик фаолиятини  бошламоқчи бўлган фуқаролар ҳамда янги тадбиркорлик фаолиятини йўлга қўйган ёшларга товар белгилари(бренд)ни олиш тартиблари, заруриятлари ҳамда уларнинг товар белгиларига эгалик ҳуқуқлари тўғрисида тушунтиришлар бериб ўтишди.

Тадбир якунида давлат органлари вакиллари ва тадбиркорлар томонидан интелектуал мулк объектларини давлат рўйхатидан ўтказиш ва муҳофаза қилишда амалиётда учраётган ҳолатлар юзасидан фикрлар билдирилди.    

Йиғилиш якунида иштирокчилар ўзларини қизиқтирган саволларга жавоб олишди.

ССП Матбуот хизмати