Қорақалпоғистон Республикаси ва Хоразм вилоятидаги тадбиркорларга бир қатор имтиёзлар берилмоқда.

Ўзбекистон Республикаси Президентининг 2021 йил 23 ноябрдаги “Оролбўйи минтақасида тадбиркорликни жадал ривожлантиришга оид қўшимча чора-тадбирлар тўғрисида”ги ПФ-25-сон Фармони имзоланди.

Мазкур Фармонга кўра, 2022 йил 1 январдан 2023 йил 1 январгача Қорақалпоғистон Республикасининг Мўйноқ туманидаги маҳаллий саноат, қишлоқ ва хизматлар соҳаларидаги тадбиркорлик субъектлари учун фойда солиғи, айланмадан олинадган солиқ, ижтимоий солиқ, жисмоний шахслардан олинадиган даромад солиғи бўйича ўрнатилган солиқ ставкаларини 1 фоиз  белгиланади.

Шунингдек, мол-мулк солиғи, ер солиғи ва сув ресурсларидан фойдаланганлик учун солиқ ставкаларини мазкур солиқлар бўйича ҳисобланган суммадан 1 фоиз миқдорида белгиланади.

2025 йил 1 январгача Хоразм вилоятининг Тупроққалъа, Янгиариқ, Янгибозор туманларида янги ташкил этиладиган ва шу туманларда рўйҳатдан ўтган ҳолда фаолият кўрсатадиган тадбиркорлик субъектлари бўйича фойда солиғи, юридик шахслардан олинадиган ер солиғи, юридик шахсларнинг
мол-мулкига солинадиган солиқ ставкаларини 50 фоизга камайтириш ҳамда Ўзбекистон Республикасида ишлаб чиқарилмайдиган ўз ишлаб чиқариш эҳтиёжлари учун олиб кириладиган хомашё материалларни божхона божидан озод қилинади.

Хоразм вилоятида янги барпо этилаётган боғлар, токзорлар ва тутзорлар эгаллаган ерларга, юридик шахслардан олинадиган ер солиғини тўлаш бўйича имтиёзли давр 5 йил этиб белгиланди.

Хоразм вилоятида ижтимоий-иқтисодий ривожланишдан ортда қолаётган ва ишсизлик даражаси юқори бўлган 98 та маҳалла учун 2022-2026 йиллар давомида:

“маҳаллабай” ишлаш тизимини жорий этиш мақсадида 200 миллиард сўм ажратиш;

аҳолини тадбиркорликка ўқитиш ва жалб қилиш лойиҳаларини амалга оширадиган нодавлат нотижорат ташкилотларини қўллаб-қувватлаш учун 50 миллиард сўм миқдорида кредит ресурслари ажратилади.

Фармон билан Республика бюджети ҳисобидан инфратузилмани ривожлантириш учун 150 миллиард сўм маблағ ажаратилади.

2022 йил 1 январдан 2027 йил 1 январгача Оролбўйи минтақасида фаолият юритаётган кичик тадбиркорлик субъектларига корхона қурилиши учун зарур бўлган асбоб-ускуна ва техникаларни республиканинг бошқа ҳудудларига етказиб бериш билан боғлиқ темир йўл транспортида ташиш харажатларини 50 фоиз қисми қоплаб берилади.

Маҳаллий экспортчилар томонидан ишлаб чиқарилган юқори қўшилган қийматга эга маҳсулотларни экспорт қилишда, уларнинг Каспий денгизигача ташиш билан боғлиқ транспорт ҳаражатларини тўлиқ қоплаб бериш тартиби жорий этилади.

ССП Матбуот хизмати