Жамоатчилик экспертизаси ўтказилган яна бир норматив-ҳуқуқий ҳужжат лойиҳаси хусусида

“Ўзбекистон Республикаси Савдо-саноат палатаси тўғрисида”ги Қонуннинг 22-моддасида белгиланган Савдо-саноат палатасининг қонун ижодкорлиги соҳасидаги ваколатларини амалга оширган ҳолда, Палата томонидан қонунчилик ҳужжатлари лойиҳалари юзасидан Жамоатчилик экспертизалари ўтказилиб, уларнинг тадбиркорлик фаолиятига таъсирини баҳолаган ҳолда, салбий ҳамда ижобий характердаги Хулосалар бериб келинмоқда.

Мисол учун, Ўзбекистон Республикаси Соғлиқни сақлаш вазирлиги томонидан ишлаб чиқилган Ўзбекистон Республикаси Президентининг “Эндокринология хизматини такомиллаштириш ва кўламини кенгайтириш чора-тадбирлари тўғрисида”ги Қарори (ID-54978) лойиҳаси  жамоатчилик экспертизасидан  ўтказилиб, у юзасидан қуйидагича Жамоатчилик экспертизаси хулосаси берилди:

1.Лойиҳа 3-банди “д” кичик бандига кўра:

“Белгилаб қўйилсинки:

д) 2023 йилдан бошлаб Ўзбекистонда ош тузини ишлаб чиқарувчи корхоналар замонавий йод аниқловчи лаборатория, йодлаш ускунаси (дозатор) ва йодат калий билан таъминланмаган бўлган тақдирда фаолиятига чек қўйилади”.

Бироқ, бундай кескин чекловларнинг ўрнатилиши озиқ-овқат маҳсулотлари ишлаб чиқарувчилар фаолиятига салбий таъсир кўрсатиши, шунингдек яширин иқтисодиёт ҳиссасининг ошишига замин яратиб бериши мумкин.

Эътироф этиш жоизки, лойиҳа муаллифи томонидан мазкур талаб ва чекловлар етарлича асослантирилмаган.

Хусусан, бундай ўзгартиришларга зарурият ҳамда амалдаги тартиб натижасида вужудга келаётган муаммолар таҳлили, шунингдек хорижий тажриба келтирилмаган.

Бунда, бу каби ўзгартиришларни чуқур таҳлил қилмасдан амалга ошириш амалиётда кутилган натижаларни бермасдан аксинча салбий оқибатларга олиб келиши мумкин.

Шу сабабли, лойиҳа 3-банди “д” кичик бандини юқоридаги масалаларни чуқур таҳлил қилган ҳолда ҳамда хорижий давлатлар ижобий тажрибасидан келиб чиқиб қайта кўриб чиқиш мақсадга мувофиқ.

2.Лойиҳа 9-бандига кўра, “Соғлиқни сақлаш вазирлиги 2022 йил 1 апрелдан бошлаб таркибида ёғлар, туз ва қанд миқдори юқори бўлган озиқ-овқат маҳсулотлари тоифасига кирувчи товарларни соат 7-00 дан соат 22-00 га қадар телевидение ва радио орқали реклама қилишни тақиқлаш тўғрисидаги таклифига розилик берилсин”.

Мазкур Хулосанинг 1-бандида келтирилган асосларни инобатга олиб, лойиҳа 9-бандини чиқариб ташлаш лозим.

3.Лойиҳа 10-бандига кўра:

“2022 йил 1 июлдан бошлаб Истемолчилар ҳуқуқни ҳимоя қилиш агентлиги ҳамда Санитария-эпидемиологик осойишталик ва жамоат саломатлиги хизматига:

чакана савдо жойларида реализация қиланишга мўлжаланган ош тузини “Сирли харидор” тамойили асосида назорат харидини амалга ошириш, ош тузи таркибини белгиланган талабларга мослигини аниқлаш ҳамда сифатида номувофиқлик аниқланса ишлаб чиқарувчи корхоналар фаолиятини хабордор қилиш тартибида назорат қилиш ваколати берилсин”.

Таъкидлаш лозимки, Ўзбекистон Республикаси Президентининг 2018 йил 27 июлдаги ПФ-5490-сон Фармони билан Текширувларни электрон рўйхатга олиш ягона тизимида рўйхатдан ўтказиш орқали ваколатли органни хабардор этиш тартибида ўтказиладиган текширувлар Рўйҳати тасдиқланган бўлиб, унда (10 ва 31-бандларида) Истемолчилар ҳуқуқни ҳимоя қилиш агентлиги ҳамда Санитария-эпидемиологик осойишталик ва жамоат саломатлиги хизматига тадбиркорлик субъектлари фаолиятини хабардор этиш тартибида текшириш ваколати берилган.

Яъни ушбу ваколатларни лойиҳада такрорлашга эҳтиёж мавжуд эмас.

ССП Ахборот-хизмати