Ўзбекистон Савдо-саноат палатаси томонидан яна бир тадбиркорнинг ҳуқуқ ва қонуний манфаатлари ҳимоя қилинди

Ўзбекистон Савдо-саноат палатасига унинг аъзоси “DRILLFLOT-ASIA” МЧЖ мурожаат қилиб, ҳуқуқ ва қонуний манфаатларини ҳимоя қилишда амалий ёрдам сўраган.

“DRILLFLOT-ASIA” МЧЖнинг мурожжати ўрганиб чиқилганда, Тошкент шаҳар Давлат солиқ бошқармаси томонидан “DRILLFLOT-ASIA” МЧЖ фаолиятида 2020 йил январь ва 2021 йил июнь ойлари оралиғида ҚҚС тўғри ҳисобланиши ва бюджетга тўланиши бўйича камерал солиқ текшируви ўтказилган ва натижаси бўйича далолатнома тузилган.

Сўнгра, Тошкент шаҳар Давлат солиқ бошқармаси томонидан “Камерал солиқ текширувида аниқланган солиққа оид ҳуқуқбузарликлар материалларини кўриб чиқиш тўғрисида”ги 20/1-110840-сонли қарори билан “DRILLFLOT-ASIA” МЧЖга жами 104 млн. сўм ҚҚС ҳисобланган.

Ушбу қарордан норози бўлиб “DRILLFLOT-ASIA” МЧЖ томонидан Давлат солиқ қўмитасига киритилган шикоят аризаси қўмитанинг
11.11.2021 йилдаги қарори билан қаноатлантириш рад этилган.

Мазкур масала юзасидан Палата томонидан ўз аъзоси “DRILLFLOT-ASIA” МЧЖ манфаатида Давлат солиқ қўмитаси ва Тошкент шаҳар Давлат солиқ бошқармасига нисбатан улар томонидан қабул қилинган қарорларни ҳақиқий эмас деб топиш тўғрисида судга ариза киритилган.

Тошкент туманлараро маъмурий судининг ҳал қилув қарори билан Палата томонидан киритилган ариза талаблари қаноатлантирилиб, Давлат солиқ қўмитаси ва Тошкент шаҳар Давлат солиқ бошқармасининг қарорлари ҳақиқий эмас деб топилган ва шу орқали Палата аъзосининг ҳуқуқ ва қонуний манфаатлари ҳимоя қилинган.

ССП Ахборот-хизмати