ССП Раиси А.Икрамов Украинанинг Ўзбекистондаги фавқулодда ва мухтор элчиси Н.Дорошенко билан учрашув ўтказди.

Жорий йилнинг 19 январь куни Савдо-саноат палатасида Палата раиси А.Икрамов ҳамда Украинанинг Ўзбекистондаги фавқулодда ва мухтор элчиси Н.Дорошенко ўртасида учрашув бўлиб ўтди.

Учрашув бошида томонлар ўтган 2021 йил давомида ҳамкорликда амалга оширилган ишлар ва икки мамлакат Савдо-саноат палаталари ўртасида ўтказилган қўшма тадбирлар натижалари ҳақида фикр алмашдилар.

Маълумот учун: 2021 йилнинг май ойида Ўзбекистон-Украина бизнес форуми ва Ишбилармонлар кенгашининг биринчи йиғилиши бўлиб ўтган эди.

Форум доирасида қатор икки томонлама ҳужжатлар, жумладан, Ўзбекистон ва Украина Савдо-саноат палаталари ўртасидаги келгуси ҳамкорликнинг йўл харитаси, ишбилармонлар кенгаши биринчи йиғилишининг баённомалари, шунингдек Томонларнинг ССП ҳудудий палаталари ўртасида ҳамкорлик тўғрисидаги шартнома ҳам имзоланган эди.

2022 йилда ҳам икки томонлама ҳамкорликни мустаҳкамлаш ва иқтисодиётнинг барча секторларида ўзаро алоқаларни ўрнатиш масалалари муҳокама қилинар экан, энг аввало икки мамлакат тадбиркорлари ўратсида тажриба алмашиш ҳамда ҳамкорлик ўрнатиш учун қулай майдон яратиш энг муҳим мавзулардан бири бўлди.

Шундан келиб чиқиб Украина элчиси томонидан 2022 йилнинг апрель ойида Украинада навбатдаги бизнес форум ҳамда Ишбилармонлар кенгаши йиғилишини ташкил этиш ташаббуси илгари сурилди.

Ташабуус Ўзбекистон Савдо-саноат палатаси раиси томонидан маъқулланиб, тадбирларни юқори савияда ташкил этиш борасида бир қатор таклифлар берилди.

Шунингдек учрашув давомида аёллар бизнес форуми ҳамда ҳунармандчилик маҳсулотлари кўргазмаларини ҳам ташкил этиш борасида фикр алмашилди.

ССП Ахборот-хизмати